مرسته     |     دپاڼي نقشه     |     ننوتل
دخپریدو نیټه : 2013-06-29   مخپرونکئ : 049 - دبېنواخبریال - کندهار

(( د کندهار د پوهني بهير په فساد ککړ او تدريسي بهير په ټپه ولاړ دی ))

د کندهار ولايتي شورا وايې چې د کندهار معارف سکوت دی  او تر غوږونو پوري په فساد کې ډوب دی .
د شورا ريس د کندهار د پوهني بهير د تدريس ، اداري چارو او نورو مهمو برخو له امله په ټپه ولاړ بولي او د فساد په اړه د اسنادو د درلودلو خبره هم کوي .
د کندهار د پوهني بهير چې  له لويه سره د زياتو ستونزو سره مخ دی ، تدريسي بهير يې ټکنی ، اداري چاري يې پڅي او فساد پکښي خپل اوج ته رسيدلی دی .
د کندهار دعامو خلکو تر څنګ دا بهير د کندهار د ولايتي شورا له لوري هم د سختو نيوکو سره مخ دی .
که څه هم ولايتي ادارې د دې بهير د ښه والي دپاره يوه کميټه جوړه کړې خو تر اوسه يې د کار کولو څرک نه دی تر سترګو شوی .
د کندهار د ولايتي شورا رييس حاجي سيدجان خاکريزوال بينوا ته وويل ،  چې په څو څو ځله يې د کندهار د ښوونځيو څخه ليدني کړي خو تر اوسه پکښي د بهبود څرک نه ليدل کيږي  ، هغه د يو عالم نورو ستونزو تر څنګ فساد او په دې برخه کې د پيسو غلا هغه څه بولي چې وايې په اړه يې کره اسناد هم لري .
خاکريزوال وايې چې د کندهار د پوهني د پر هيڅ حساب بهير دپاره به د کابل د مرکزي ادارې سره جدي خبري وکړي او دلته به دا اداره چې  تر نورو يې فعاليت زيات مهم دی له هر څه پاکه کړي .
د کندهار د پوهني رييس شيراقا صافی هم د شويو ادعاوو په اړه د کره اسنادو پر وړاندي کولو ټينګار کوي ، صافی وايې اسناد کولای شي چې د غيرقانوني کړنو او فساد د مخنيوي دپاره د دوی سره مرسته وکړي .
په وينا يې هڅه کوي چې صادقانه خدمت تر سره کړي خو که يې د کارکوونکو د درغليو ، وظيفوي ناغيړيو او د پيسو د غلا په اړه اسناد ورته ورسيږي ، د خپلو فاسدو کسانو په وړاندي به قانوني کړني تر سره کړي .
بلخوا د کندهار د پوهني رياست تدريسي مرستيال محمد عوض نظري وايې چې د تير تعليمي کال پر مهال ۵۰ بابه ښوونځي بيا  پرانستل شوي او ۱۰۰ لا تړلي پاتي دي .
کندهار چي د ناامنه ولايتونو په نوم پيژندل شوی دی او مرکزي ادارو ته يې بهانه ورجوړه کړې ده د مرکزي ادارو د نه پاملرني له  امله هم زياتي ستونزي لري ، د دې ولايت د پوهني چارواکي وايې چې تر دې مهاله د روان کال بوديجه هم نه ده ورکړل شوې .
په يو شمير ولسواليو کې خلک وايې چې ښوونځي قلف دي خو د ښوونکو او کارکوونکو معاشونه يې د پوهني رياست د يو شمير کارکوونکو په همکاري راوځي او د دوی تر څنګ د ولسواليو د پوهني د مديرانو شخصي جيبونو ته لويږي .

 

Answer Machine : + 1 (518) 5577770   --   USA Tel : +1 20 38 202020   --   AFG Tel : + 93 (786) 909000  --   Director Email : khalid_hadi@hotmail.com   --   Editor Email : rahila.jawad@gmail.com
Benawa.com    Copyright ©   2004-2018   All Rights Reserved     Powered by:Benawa Network     Design by: Khalid Hadi Hiadery