فتوي نمبر(۷۳۵):
مستفتي : رحمت الله مومند .
پوښتنه :
د عاليقدر محترم أبوالفضل صاحب د روغتيا او صحت په هيله ، قدرمنه زما پوښتنه د لمانځه په اړه ده ، هغه دا چي که يو شخص پر ولاړي قدرت درلودئ خو د سجدې او رکوع توان نه ؤ ورسره ، نو ددغسي چا د لمانځه طريقه به څرنگه وي ؟ هيله کوم چي په جواب سره مو ونازوۍ .
جـــــــــــواب :
محترمه ! هغه څوک چي يواځي د لمانځه د ولاړي د فريضې قدرت لري خو سجده نسي کولائ ، عام له دې که رکوع کولائ سي او که نه ، نو پداسي حالت کي دده و خوښۍ ته اعتبار دئ ، او ده لره اختيار ورکول کيږي ، که د ولاړي په حال کي په اشاره سره لمونځ کوي ، او که د ناستي په حالت کي په اشاره سره ، خو رکوع به هم په اشاره سره کوي که څه قدرت باندي لري .
البته پدغو دوو لارو کي غوره داده چي د ناستي په حالت کي په اشاره سره لمونځ ادا کي .
دا د جمهورو او اکثرو علماؤ رايه ده .
[رد المحتار : (۱ / ۲۹۹ ) هدايه : ص ۱۴۲ باب صلاة المريض ، البحرالرائق : (۲ / ۱۱۶) .] .