د کابل پوهنتون استاد ښاغلي عطامحمد ياري څه موده مخکي بېنوا ويبپاڼي ته ليک راليږلی ، و ، ددې لپاره چي د تخنيکي ستونزو له کبله يې موږ ته ليک په ځنډ رارسيدلی دی ، ليک يې کټ مټ خپروو او درانه لوستونکي يې له وړانديه خبروو ، او له ښاغلي استاد نه د ليک په ځنډ خپرېدا له کبله بخښنه غواړو .
په درناوي ( د بېنوا ويبپاڼي چلوونکي )
د بينوا ويبپاڼې ښاغلو چلوونكو او درنو لوستونكو:
زما نېكې هيلې ومنۍ.
د خوښۍ ځاى ده چې د پښتو ژبې ويبپاڼې ورځ په ورځ لا ښكلې او شتمنې كيږي، او د شمير له پلوه هم مخ په ډيريدو دي. زه په داسې حال كې چې ستاسو د هڅو بېدريغه ستاينه كوم، غواړم ستاسو له لارې ټولو هغو مخكښو ته چې په دې اړوند سوچ او كار كوي او يا هم د كمپيوټرپوهنې سره بوخت دي څو وړانديزونه وكړم:
- پښتو ژبه په كمپيوټر كې د ليكلو لپاره د يوه معياري ليكمن (كيبورډ) كارونې او په پراخه كچه د هغه منلو ته اړتيا لري. وړانديز كوم چې ځينې فرهنګي ټولنې او يا مخكښ كسان راوړاندي شي او په دې هكله د يوه اړين ګډ ګام د پورته كولو لپاره څينې غونډې او اړيكې سمبالې كړي.
- له بله پلوه په ډيټابيسونو كې په پښتو ژبه د مالوماتو د كارونې لپاره دې ته اړتيا ده چې پښتو توري د كمپيوټرونو چلوونكو سيستمونوته د پوره پيژندلو وړ شي. په دې هكله د افغاني پوهانو، فرهنګي ټولنو، كارخاوندانو او افغان دولت ګډ كار ته اړتيا ده. برسيره پر دې، له ځينو نړيوالو كمپيوټر او پروګرام جوړونكو كمپنيو سره هم په دې هكله د اړيكو نيولو ته ضرورت دى. ددې كار لپاره ډير قوي دليل د پښتو ژبې د جامع والي خبره ده. دا ژبه د خپلو ځانګړو تورو نه پرته د عربي او فارسي ژبود ټولو تورو لرونكې ده. په اقتصادي او مالوماتي لحاظ د جامعو سيستمونو جوړول، پيرودل او كارول خصوصي او دولتي ارګانونو ته ډير مطلوب او اړين كار دى.
هيله ده چې د پورتنيو وړانديزونو په هكله سوچ او كار وشي.
په خورا درنښت
پوهنيار عطامحمد يارى
د كابل پوهنتون استاد
