تیروتلی بریښنالیک

یوکس بل ځای ته په سفر ځي. له رسیدو سره سم ګوري چې په خونه کښې یی د کمپیوټر او انټرنیټ آسانتیا شته ځکه نو پریکړه کوي چې زرترزره خپلې میرمنې ته بریښنالیک ولیږي.لیک لیکي خو د پتې وروستی توری ورڅخه غلطیږي او سمدلاسه یی لیږي.
په همدې حال کښې ددې نړۍ په یو بل ګوټ کښې یوه میرمن چې همدا اوس اوس يي خپل خاوند خاورو ته سپارلی، په دې فکر چې ښایي دوستانو یي ورته د خواشینۍ ښودلو کوم بریښنالیک رالیږلي وي غواړي خپل بريښنالیکونه وګوري.
همدا چې لومړی بریښنالیک لولي بې هوښه کیږي او په ځمکه رالویږي.
زوی یی په ویره راځي ګوري چې مور يي بې هوښه ده او په همدې حال کښې یی سترګې د کمپیوټر په پاڼه لګیږي ګوري چې په بریښنالیک کښې داسې لیکل شوي:
ګرانې میرمنې سلام!
پوهیږم چې له دې لیک په تر لاسه کولو به پوره هیښه شې.
رښتیا دلته هم کمپیوټرونه او نورې آسانتیاوې شته او هر څوک کولی شې دوستانو ته یی لیک ولیږي . زه همدا اوس راورسیدم او هرڅه مې تر نظر تیر کړل.
هرڅه ستا دراتګ لپاره تیار دي، سبا به دې ووینم.
په دې هیله چې ستا راتګ هم زما په شان بې ویرې وي...
اوه...دلته څومره ګرمي ده!!!