http://www.bbc.co.uk/urdu/world/2012/08/120817_germany_caricatures_sa.shtml
د جرمني د پلازمېني برلين يوې محکمې و يوې ښې اړخي ډلې ته اجازه ورکړې ده چي د اسلام د پېغمبر حضرت محمد ص شخړيزه کارټوني رسمونه پر کارډونو چاپ کړي.
«پرو ډويچلانډ» نومي دغه ډله په پام کي لري چي د راتلونکي اونۍ په آخره کي د برلين د مسجدونو دباندي مظاهرې تر سره کړي. نوموړې ډله دغه مظاهرې د « اسلام د جرمني سره اړيکي نه لري، اسلامای زېشن ودروئ» تر عنوان لاندي تر سره کوونکې ده.
د اسلام د پېغمبر حضرت محمد ص دغه شخړيزه رسمونه په ۲۰۰۵ مېلادي کال د ډنمارک په يوه اخبار کي خپاره سوي ول، چي له کبله يې په ټوله نړۍ کي احتجاجي مظاهرې تر سره سوي وې.
د اسلام د ديني اصولو له مخي د حضرت محمد ص انځورونه او رسمونه جوړول منع دي.
د بي بي سي خبريال ظهيرالدين بابر چي کله په جرمني کي د اوسېدونکي ژورنالستي عشرت معين څخه پدې حواله خبري وکړې، نو معين وويل چي په جرمني کي د مسلمانانو سره ناوړه چلن کيږي.
هغې زياته کړل چي نوموړي ښې اړخي ډلې د برلين په بيلو مساجدو کي تخريبي کړنې هم تر سره کړي دي او د دغو دباندي يې د نازيانو سمبول «شواشټکا» هم رسم کړی دی.
محکمې په خپله پرېکړه کي د درو مسجدونو د منتظيمينو هغه عارضه رد کړې ده چي پکښي د اونۍ په آخره کي په تر سره کېدونکو مظاهرو کي د پېغمر اسلام ص د رسمونو په ښودلو د بنديز لګولو غوښتنه سوې وه.
محکمې ويلي ول چي د پېغمبر اسلام ص رسمونه ښودل د هيڅ کومي ډلې پر ضد د کرکي يا تاوتريخوالي د عمل په توګه نه سي ليدل کېدلای.
په عيني حال کي د برلين پوليس پدغو مظاهرو کي د سخت تشنج او تاوتريخوالي د رامنځ ته کېدو د مخنيوي لپاره تياری نيسي.
