دغه ځای زما نه دی
ژڼي نه خاندي
د پېغلوټو غږونه یې غوږونه نه تخنوي
دلته هرڅه د پیسو لپاره دي
دلته چا کې مینه نه شته
دلته کورنۍ نشته
پرون یو مړي پسې
یوازې د ښاروالۍ یو موتر راغی
ښه مې یاد دي
تېره اوونۍ زموږ د ګاوندي
په واده کې
تول تال اوه کسان مېلمانه ول
رښتیا نه ګورې
پاس اسمان یې په ورېځو
ګنډلی
او لاندې د انسانانو
مزي په پیسو
تړلي
دا ډېرو بازاري مینو
زړه راخوړلی
دلته د چا کالي
او د چا د کور ښایست
د ژوند کولو لپاره نه دی
زړه مې له دې ټولو تور دی
یو ډول کرکه ترې لرم
دا کوم ځای دی ؟
مګر داسې هم کېدای شي چې :
ښځې دې هره ورځ بستر بدل کړي ؟
هو ! دا کرکجن کار دلته کېدای شي
رښتیا پرون مې په لاس کې
ګلانو
هېڅ مچۍ مسته نه کړه
زه کرکه لرم
کرکجن نه یم
خو له دې ( پیکه ) ژوند نه
کرکه لرم
ښایي موږ هغه محکومان یو
چې د شاته تګ لاره نه لرو
کرکه لرم
زه ډېره کرکه لرم له دغه شان پرمختګ نه .
د ۲۰۰۴ ز کال د جولای ۱۵ ــ ډنمارک
