روسیه: امریکا په افغانستان کې د داعش په اړه له موږسره معلومات نه شریکوي

روسیه وايي چې د امریکا د متحدو ایالتونو دفاع وزارت په افغانستان کې د داعش د فعالیتونو د غځېدو په اړه له دوی سره معلومات نه شریکوي. د سپوتنیک د راپور له مخې د روسیې مرستیال دفاع وزیر اناتولي انتونوف ریا نووستي خبري اژانس ته وویل، داعش چې هڅه کوي د خپل فعالیت او نفوذ ساحه پراخه کړي ممکن د افغانستان حالات اغېزمن کړي. خو د پینتاګون ویندوی ریانووستي خبري اژانس ته وویل چې په افغانستان کې د آی ایس یا داعش فعالیت لا د پام وړ نه دی. دغه ویندوی په عین حال کې ومنله چې چې د طالبانو ځیني غړي داعش ته اوړي. ده همداراز وویل، د امریکا متحد ایالتونه په ځیر حالات څاري چې ایا داعش په افغانستان کې پر حالاتو د پام وړ اغېز لري او که نه، خو تر دې دمه پینتاګون د داعش له لوري یو نیم ځای د کسانو د جلب و جذب محدود فعالیت ویني.