ولسمشرغني: پر جوماتونو برید کوونکي په ښکاره د اسلام دښمنان دي

ولسمشر محمد اشرف غني پر جوماتونو او دیني عالمانو بریدګر د اسلام ښکار دښمنان وبلل. له ولسمشرۍ ماڼۍ په یوه خپره شوې خبرپاڼه کې راغلي، چې ولسمشر د هلمند په مرکز لښکرګاه ښار کې پر یو جومات د وسله والو پرونی برید په کلکه غندلی دی. تېره ورځ یوې ډلې وسله والو په لښکرګاه ښار کې پر یوه جومات برید وکړ، چې له امله یې ۱۰ تنه و وژل شول او همدومره نور ټپیان شول. دغه برید هغه مهال ترسره شو، چې د هلمند ولایت دیني عالمانو په یاد جامع جومات کې ناسته درلوده. د ولسمشرۍ ماڼۍ د خبرپاڼې په باور ولسمشر غني، دیني عالمان د سولې او ورورولۍ پیغام راوړونکي بولي او پرې برید کوونکي یې د اسلام ښکاره دښمنان بللي دي.