یو شمېر شنونکو د صلاح الدین رباني وروستۍ څرګندونې غیر قانوني وبللې

د سياسي او پوځي چارو يو شمېر شنونکي وايي د يوه ګوند له دريځه د هېواد د روانو چارو په اړه د بهرنيو چارو وزير صلاح الدين رباني وروستۍ څرګندونې غيرقانوني دي. د بهرنيو چارو وزير صلاح الدين رباني چې د جمعيت اسلامي ګوند مشر هم دى په بدخشان کې له يو شمېر سيمه ييزو مخورو او امنيتي سرتېرو سره د ناستې په ترڅ کې ويلي، چې د امنيت په ټينګښت کې د "مجاهدينو" شتون بايد له پامه ونه غورځول شي.د سياسي چارو کارپوه حسن حقيار وايي چې د هېواد د بهرنيو چارو د وزير له لوري داسې خبرې د هېواد په زيان دي. د حقيار په وينا، د ملي يووالي په حکومت کې د مجاهدينو حضورپراخ دی. د پوځي چارو کارپوه عتيق الله امرخېل هم وويل چې دا ډول څرګندونې اختلاف راپاروونکې او د اندېښنې وړ دي.امرخېل څرګنده کړه، اوسمهال خلک يووالي ته اړتيا لري او بايد له دغه ډول څرګندونو ډډه وشي.