دخپریدو نیټه : 2015-07-21 مخپرونکئ : 128 - دبېنواخبریال - کابل
موټرچلونکي: د ترافيکو له خوا د توقفي موټرو پرزې غلا کیږي
احمد فیصل
ځيني موټر چلوونکي وايي، د کابل د موټرو په "ګوانتانامو" کې يې د موټرو پرزې ورکې شوې او رشوت ورکولو ته اړ شوي دي، خو د ترافيکو رياست دغه ادعاوې ناسمې بولي. د ترافيکو له خوا د توقفي موټرو تمځاى چې د خلکو په تېره بيا موټر چلوونکو تر منځ يې د "موټرو ګوانتانامو" په نوم شهرت موندلى، د کابل ښار په څلورمه ناحيه کې موقعيت لري. د ترافيک پوليس دغه تمځاى ته هغه موټر لېږدوي چې چلوونکو يې له ترافيکو قواعدو سرغړونه کړې وي او يا يې حادثه کړې وي. هلته وړل شوي موټر د موټر چلوونکي له خوا د جريمې تر ورکړې وروسته بېرته ورکول کېږي. چلوونکي وايي، دغه تمځاى ته بيول شوي موټر داسې په سختۍ بېرته راوځي لکه په ګوانتانامو کې د امريکايانو له زندان څخه چې زنداني په سختۍ را ايستل کېږي. هغوى وايي، له همدې امله يې پر ياد تمځاى ګوانتانامو نوم اېښى دى.
