ولسمشر غني: د الکترونیکي تذکرو د وېشلو پرېکړه نه ده شوې

ولسمشر اشرف غني دا خبره رد کړه چې ګنې الیکترونیکي تذکرې توزیع کېدو ته چمتو دي او د وېشلو پرېکړه یې شوې ده. مخکې د اجرايي ریاست له لوري په یوه خپره شوې خبرپاڼه کې ویل شوي و چې کابینې د الیکترونیکي تذکرو د وېشلو پرېکړه کړې او نوي تذکرې به په هغه بڼه وي چې ولسي جرګې یې په اړه پرېکړه کړې وه. د اجرايي ریاست اشاره دې ته وه چې په تذکره کې به د «افغان» او «اسلام» یادونه نه کېږي. ولسمشر محمد اشرف غني د احصایې په قانون کې د ستونزو یادونه کړې چې تعدیل او د الیکترونیکي تذکرو تر توزیع وړاندې د ولسي جرګې تصویب ته اړتیا لري. ده ویلي په دې قانون کې باید یو شمېر اصلاحات (تعدیلات) راوستل شي او دا کار به په راتلونکو څو اوونیو کې وشي.