روسیې په افغانستان کې د نشه یي توکو پر زیاتوالي اندېښنه څرنګه کړې ده

روسیې یو ځل بیا په افغانستان کې د نشه یي توکو د کر پر زیاتوالي اندېښنه څرګنده کړې ده. له نشه یي توکو سره د روسیې د مبارزې د فدرالي ادارې مشر ویکتور ايوانوف ویلي چې په تېرو دریو کلونو کې په افغانستان کې د هغو ځمکو کچه چې نشه یي توکو ورباندې کرل کېږي ۶۰ سلنې ته زیاته شوې ده. ده په افغانستان کې د امریکايي او ناټو ځواکونو پر حضور د نیوکې په ترڅ کې ویلي چې د دغو ځواکونو د عملیاتو له پیل راهیسې په دغه هېواد کې د هیروینو تولید ۴۰ سلنه زیات شوی دی. ایوانوف ویلي په داسې حال کې چې د افغان دولت ټوله بودجه ۱۳ میلیارده ډالره ده، په دغه هېواد کې د ۱۵۰ میلیارده ډالرو نشه يي توکي تولیديږي.