دخپریدو نیټه : 2015-09-12 مخپرونکئ : 128 - دبېنواخبریال - کابل
د کابل دوه پخواني ښاروالان ممنوع الخروج اعلان شوي
احمد فیصل
سرچينې وايي، د کابل دوه پخواني ښاروالان او د ښاروالۍ ځينې نور کارکوونکي پر اداري فساد د تورنېدو له امله ممنوع الخروج اعلان شوي دي. ځینو رسنیو ویلي چې د لويې څارنوالۍ د جرايمو د څېړنو رياست د ۴۲۲۲ مې شمېرې مکتوب له مخې، د کابل پخواني ښاروالان هر يو محمد يونس نواندېش او روح الله امان، د ښاري پلانونو د تطبيق او طرحې رييس انجنير محمد ياسين، د استملاک رياست کارکوونکي انجنير ايمل سليم، انجنير هدايت او سيد ولي په اداري فساد تورن شوي دي. رسنیو ته په لاس ورغلي مکتوب کې د دې کسانو د ممنوع الخروجې امر شوى او په کې ويل شوي، چې يادو دواړو ښاروالانو د کابل ښار د پنځمې ناحيې اړوند ٢٤ بلاکونه په خپلسرې توګه وېشلي او هم يې په ٦٥ جريبه ځمکه کې فساد کړى دى.
