حکیمي: له ترکمنستان سره مو د انرژۍ د لېږد او نورو پراختیايي پروژو د پلي کېدو په اړه خبرې وکړې

د مالیې وزیر وايي، چې د ترکمنستان له چارواکو سره یې د انرژۍ د لېږد او نورو پراختیايي پروژو د پلي کېدو په اړه خبرې کړې دي. اکلیل احمد حکیمي چې ترکمنستان ته یې د خپل وروستي سفر په اړه نن په یوه خبري غونډه کې رسنیو ته معلومات ورکول، وویل چې له ترکمن چارواکو سره یې د بریښنا د لیږد، د ګازو د نل لیکې د جوړېدو، د نوري فایبر د نښلولو، د صنعت د پراختیا، د لارجوردو لارې د فعالېدو او نورو پراختیایي پروژو پر پلي کېدو ګټورې خبرې وکړې. د مالیې وزیر وویل چې د افغانستان پولې ته نږدې د ترکمنستان په خاوره کې د ګازو او نفتو د زېرمو پر جوړېدو هوکړه شوې او افغان سوداګر به وکولای شي چې تر دې وروسته د هېواد د اړتیا وړ سون توکي له دغه ځایه افغانستان را ولېږدوي. هغه زیاته کړه چې د سیمنټو، مرمر ډبر او د قالینو د صنعت د پراختیا او پانګونې هم خبرې شوې دي. د مالیې وزیر وویل، چې د ټرانسپورټ په برخه کې هم یو لړ هوکړې شوې دي چې ډېر ژر به د کابل-عشق اباد ترمنځ الوتنې پیل شي.