په زابل کې اوس هم د داعش ډلې او طالبانو ترمنځ جګړه روانه ده

چارواکي وايي زابل کې د داعش او طالب وسله والو تر منځ جګړه اوس هم روانه ده او تر دې مهاله له دواړو ډلو د وژل شوو وسله والو شمېر ١١٠ ته رسېدلى دى. دا جګړه درې ورځې مخکې د زابل په ارغنداب ولسوالۍ کې پيل شوې ده. د زابل د امنيې قوماندانۍ د امنيت امر ډګروال غلام جيلاني فراهي وايي، دا جګړه تر ارغنداب وروسته خاک افغان او داى چوپان ولسواليو ته هم غځېدلې، چې تر دې مهاله پکې له دواړو لورو لسګونو وسله والو ته مرګ ژوبله اوښتې او لسګونه داعشي او ازبک وسله وال طالبانو ژوندي نيولي دي. د ارغنداب ولسوال حاجي مهمند نصرتيار وايي، جګړه اوس د خاک افغان ولسوالۍ د سوډاني په غرنيو سيمو کې روانه او تر اوسه پکې د ملا اختر منصور له ډلې ٢٥ وسله وال او د ملا دادالله له ډلې چې داعش وسله وال هم ورسره دي، ٨٥ تنه وژل شوي دي.