ناټو په ۲۰۱۶ کال کې ۱۲ زره پوځیان په افغانستان کې پرېږدي

د ناټو سرمنشي وايي د دغه سازمان غړي به په ۲۰۱۶ کال کې هم په افغانستان کې ۱۲ زره پوځیان پرېږدي. ټاکل شوې وه چې د ناټو دا شمېر پوځیان د سږ کال تر پایه نیمايي ته رالږ شوي وای او د راتلونکي کال تر پایه پاتې نیمايي هم په تدریجي ډول وتلي وای خو د وسله والو طالبانو له لوري د بریدونو شدت، په تېره بیا د طالبانو له لوري د لنډې مودې لپاره د کندوز ښار نیول سبب شول چې امریکا او د ناټو غړي خپله پرېکړه بدله کړي. د ناټو سر منشي د بهرنیو چارو د وزیرانو له غونډې وروسته ویل :«د ناټو متحدانو او د غوڅ ملاتړ په ماموریت کې شاملو غړو موافقه وکړه چې د غوڅ ملاتړ ماموریت حضور ته دوام ورکوي.» ستولتن برګ وویل، ناټو ماموریت هغه وخت بشپړېږي چې د افغانستان حکومت دومره قوت ومومي چې د خپل هېواد امنیت په خپله ساتلی شي.