سږ کال تر ۶۰ میلیونه ډېر انسان د خپلو کورونو پرېښودو ته اړ شوي

ملګري ملتونه وايي چې روان کال په نړۍ کې تر ۶۰ ملیونه زیات انسانان د کور- اور پرېښودو او مهاجرېدو ته مجبوره شوي دي. د ملګروملتو د کډوالو د لویې کمیشنرۍ د راپور له مخې، له هرو ۱۱۲ تنو څخه یو تن مجبوره شوی چې کور پرېږدي. د دې کمیشنرۍ په وینا په دې شمېر کې ۲۰ ملیونه پناه غوښتونکي هم شامل دي. د ملګروملتو د راپور پر اساس له ۱۹۹۲ را په دې خوا هیڅکله دومره انسانان مهاجر شوي نه ول. د دې راپور له مخې په سوریه، اوکراین، افغانستان، عراق، سومالیا، جنوبي سوډان، برونډي، منځنۍ افریقا او کانګو جمهوریت کې د جګړو زیاتوالي د کډوالو شمېر ډېر کړی دی. په دې راپور کې همداراز ویل شوي چې د تېر کال د ورته مودې په پرتله د پناه غوښتونکو شمېر په سلو کې ۷۸ زیات شوی دی او د کورنیو بې ځایه شویو شمېر ۳۴ ملیون تنو ته رسېدلی دی.