ولسمشرغني: د اساسي قانون حفاظت او تطبیق زما تر ټولو مهمه او اصلي دنده ده

افغان ولسمشر اشرف غني وايي،د اساسي قانون د تصويب د ورځې په نمانځلو بايد بسنه ونه شي، بلکې بېلابېل بنسټونه بايد د دغې ملي وثيقې ارزښت روښانه کړي او ټولنه دې له خپلو حقوقو او وجايبو څخه خبره کړي.د ولسمشرۍ له مطبوعاتي دفتره په خپره شوې خبرپاڼه کې راغلي،چې نوموړي دغه څرګندونې د هېواد اساسي قانون له تصويب څخه د نمانځنې د ملي اونۍ په مناسبت کړې دي.ولسمشر وايي، په تېرو پنځلس کلونو کې زموږ په ملي ژوند کې یو تر ټولو لوی برياليتوب د اساسي قانون تدوین او تصویب و او د ولسمشر په توګه یې حفاظت او تطبیق، زما یوه تر ټولو مهمه او اصلي دنده ده. ده زیاته کړه: زموږ ټولو هڅه باید دا وي چې دغه ملي وثیقه پوره پوره تطبیق کړو او د خلکو د عملي ژوند برخه یې وګرځوو."