پوتین په ناڅاپي توګه له سوریې د خپلو ځواکونو د ایستلو امر وکړ

د روسیې ولسمشر ولادیمیرپوتین امر کړی، چې ځواکونه دې یې له سوریې ووځي. د روسیې د دولتي اژانس د راپور له مخې؛ ولسمشر پوتین د هغه هېواد د دفاع او بهرنیو چارو وزیرانو ته ویلي، چې په سوریه کې د روسیې د دفاع وزارت ته سپارل شوی ماموریت نور پای ته رسېدلی. ولسمشر پوتین خپلو وزیرانو ته ویلي، چې سر له همدا ننه (د مارچ له پنځلسمې دې) دې روسي ځواکونه له سوریې د راوتلو لړۍ پېل کړي. تر اوسه نه ده څرګنده چې پوتین ولې له سوریې د خپلو ځواکونو د ایستلو په اړه ناڅاپي خبر ورکړی.