ارګ: غني او عبدالله دواړه د ټاکنیز نظام اصلاح ته ژمن دي

ارګ وايي، د ملي يووالي حکومت ولسمشر اشرف غني او اجرائيه رئيس ډاکټر عبدالله دواړه د افغانستان په ټاکنيز نظام کې د اصلاحاتو راوستو ته ژمن دي. د ولسمشرۍ له مطبوعاتي دفتره په خپره شوې خبرپاڼه کې راغلي، چې د افغانستان په ټاکنيز نظام کې د اصلاحاتو د راوړلو تصميم انفرادي نه دى، بلکې د ملي شورا استازو، سياسي شخصيتونو او ملي مشرانو سره د مشورو او د ټاكنيزو اصلاحاتو ځانګړي كمېسيون د وړانديزونو پر بنسټ نيول شوى دى. سرچينه زياتوي، د افغانستان دولت په ټاکنيز نظام کې د اصلاحاتو راوړلو ته ژمن دى او د بې طرفۍ او استقلاليت اصل ته په پام، د ټاکنيزو اصلاحاتو په برخه کې د غوراوي کمېټې د فعاليتونو او اجراتو ملاتړ کوي او د دغې كمېټې كار به ژر تر ژره پيل شي. د يادونې ده، چې د ولسمشر د نوي تقنيني فرمان له مخې، چې جزئيات يې دوه ورځ وړاندې په ډاګه شول؛ د غوراوي کمېټه به له يوه نوي جوړښت سره رامنځته شي او په دې ترتيب د ټاکنو او ټاکنيزو شکايتونو کمېسيونونو مشرانو بدلون ته زمينه برابره شوې ده.