دستګیر: د سوداګرۍ ښې اړیکې د دواړو هېوادونو له ثبات سره مرسته کوي

د پاکستان د سواګرۍ وزیر وايي، د افغانستان او پاکستان تر منځ ښه سوداګري د دواړو هېوادونو اړیکې پیاوړې کولای شي. خرم دستګیر په اسلام اباد کې د ستراتیژیکو مطالعاتو مرکز کې یوې غونډې ته د وینا پر مهال ویلي، چې دوی په دې وروستېو کې له افغانستان سره د سوداګرۍ د پراختیا په لټه کې دي. نوموړي زیاته کړې، چې د دواړو هېوادونو پلاوي په دې اړه یوې هوکړې ته هم رسېدلي، چې له مخې به یې په راتلونکو کلونو کې خپلې سوداګریزې راکړې ورکړې د پخوا په پرتله دوه برابره ډېرې کړي. خرم دستګیر دغه راز ویلي، چې د سوداګرۍ ښې اړیکې د دواړو هېوادونو له ثبات او پرمختګ سره ډېره مرسته کوي. دا په داسې حال کې ده، چې افغان سوداګر وخت نا وخته سر ټکوي، چې ګني پاکستان له افغانستان سره د سوداګرۍ په اړه پر شویو هوکړو عمل نه کوي او ډېری وخت افغان سوداګرو ته سرخوږی جوړوي.