طالبانو د غزني د ښاري محکمې رییس وژلی

د غزني چارواکي وايي، وسله والو طالبانو د دغه ولایت د ښاري محکمې رييس وژلی دى. د غزني امنيه قوماندانۍ له لوري په خپره شوې خبرپاڼه کې راغلي، چې د ښاري محکمې رییس محمد انور رحماني تېره ورځ وسله والو له موټره کښته کړی او وژلی دی. په خبرپاڼه کې زياته شوې، محمد انور له کابل څخه غزني ښار ته روان و، چې وسله والو په سالارو سیمه کې له موټره کښته کړی دى. وسله والو طالبانو د محمد انور رحماني د وژلو مسووليت منلى دى. د دې ډلې وياند ذبيح الله مجاهد وايي، نوموړى او له هغه سره يو بل تن څارنوال عبدالرشيد د دوى له خوا ونيول شول، چې وروسته حکومت د هغوى د خلاصون لپاره هڅه کوله او نښته رامنځ ته شوه، چې په ترڅ کې يې دواړه ووژل شول.