لوګر کې د ملي اردو لوړپوړی چارواکی وژل شوی

د لوګر محمداغې ولسوالۍ کې د ملي اردو يو لوړپوړى چارواکى وژل شوی. د دغه ولايت د والي وياند سليم صالح، وايي افغان امنيتي ځواکونو د محمد اغې ولسوالۍ په زرغون ښار سيمه کې عملیات پېل کړي وو. صالح زیاتوي، د دغو عملیاتو مشري د ٢٠٣ تندر قول اردو د څلورمې پلې لوا قومندانۍ د ګارنيزيون قومندان ډګروال محمد جان کوله. د ده د مالوماتو له مخې، محمد جان تېر ماښام په زرغون ښار کې خپل کور ته ننوت، چې پر مهال یې د کور دروازه کې ځاى پر ځاى شوى ماین وچاودېد. د والي ویاند وايي، په دې چاودنه کې نوموړی ځای پر ځای و وژل شو. د ویلو ده چې دا په روانه اونۍ کې د ملي پوځ دویم لوړ پوړی چارواکی دی چې وژل کیږي.