پاکستان کې پروني ځانمرګي برید ۷۱ کسان وژلي

د پاکستان د پنجاب ایالت په لاهور ښار کې ځانمرګي برید ۷۱ کسان وژلي او تر ۱۵۰ ډېر نور یې ټپیان کړي دي. ځايي سرچینو د پولیسو په حواله خبر ورکړی، چې دا برېد تېره ورځ مازیګر مهال د اقبال ټاون په ګلشن اقبال پارک کې شوی دی. سرچینې زیاتوي، په دغه ځانمرګي برید کې چې د پارک دروازه کې د ګڼه ګوڼې پر مهال شوی د ښځو او ماشومانو په ګډون ۷۱ کسان وژل شوي او تر ۱۵۰ ډېر نور ټپیان دي. ویل کیږي، دغه چاودنه دومره زوروره وه، چې د سیمې په سلګونه مترۍ کې یې د کورونو او مارکېټونو شیشې ماتې کړې دي. پولیسو په لومړنېو څېړنو کې مالومه کړې، چې دغه ځانمرګی برید د مظفر ګړ سیمې یوه ۲۰ کلن ځوان یوسف کړی دی. د برید پړه لا کومې ډلې پر غاړه نه ده اخیستې.