امریکا افغان ځواکونو ته څلور نورې سوپر ټوقانو جنګي الوتکې ورکړې

امريکا، څلور نورې (A-29) ډوله جنګي الوتکې چې د ځمکنۍ موخو د له منځه وړلو په برخه کې د بېلابېل ډوله وسلو د لېږد وړتيا لري، د ملي دفاع وزارت ته وسپارلې. د ملي دفاع وزارت وياند دولت وزيري وايي، له پيلوټانو سره يو ځاى ټول تخنيکي ټيم هم په امريکا کې روزنه ترلاسه کړې ده. وزيري زياته کړه؛ دغه الوتکې په تاکتيکي سيمه کې اغېزناکې دي او د ځواکونو مورال لوړولى او د مخالفینو سنګرونو په بشپړه توګه له منځه وړلی شی. هغه وويل، چې دغه جنګي الوتکې د بېلابېلو وسلو لکه توپ، بمونو، راکټ او ماشيندارو د استعمال وړتيا لري. د وزیري د مالوماتو له مخې؛ يادې څلور الوتکې د هغو شلو الوتکو له ډلې دي، چې امريکا يې افغان ځواکونو ته د ورکړې ژمنه کړې او څلور يې له دې وړاندې هم افغان دولت ته سپارل شوې دي.