ستانکزی: بهرنۍ ترهګرې ډلې افغانستان کې د طالبانو په نوم جنګېږي

د دفاع سرپرست وزیر محمد معصوم ستانکزی وايي، بهرنۍ ترهګرې ډلې افغانستان کې د طالبانو په نوم له افغان ځواکونو سره پر جګړې بوختې دي. نوموړي چې د هېواد جنوبي ولایتونو ته په سفر تللی دغه څرګندونې په هلمند کې د یوې پوځي قرارګاه سرتېرو ته د خبرو پر مهال وکړې. ستانکزي ویلي، افغانستان کې روانه جګړه کورنی اړخ نه لري، بلکې د بهرنیانو له لورې پلان شوې توطیه ده، چې هڅه کوي افغان خاوره کې یې عملي کړي. هغه په ټینګار سره ویلي، چې هېواد کې جنګېدونکي وسله وال افغانان نه دي، بلکې بهرني ترهګر دي، چې د نورو د ګټو له پاره ورانکارې فعالیتونه کوي.