په کابل کې د تېرې ورځې برید په نړیواله کچه غندل شوی دی

د نړیوالې ټولنې مشر بانکي مون په افغانستان کې وروستی ځانمرګی برید غندلی او ویلي یې دي چې دا ډ ول بریدونه هېڅ توجېه نه لري. بانکي مون لاهې ته د سفر په لړ کې په کابل کې د تېرې ورځې برید غیر انساني عمل بللی او له ترهګرۍ سره په مبارزه یې ټینګار کړی دی. د تېرې ورځې برید په نړیواله کچه غبرګونونه راپارولي دي. سپېنې ماڼۍ هم د یوې خبرپاڼې په خپرولو دا برید غندلی او ویلي یې دي چې طالبان دې د سولې له پروسې سره یو ځای شي او له افغان وژنې دې لاس واخلي. په خبرپاڼه کې راغلي چې متحده ایالات د افغانستان ملاتړي دي او دوی به یوازې پرې نه ږدي. د نړیوالې ټولنې د امنیت شورا هم یاد برید په کلکو ټکو غندلی او دا یې د انسانیت ددښمنانو کار بللی دی. د امنیت شورا وايي طالبان، القاعده او اسلامي دولت هغه ګواښونه دي چې افغانستان ورسره مخ دی خو په وینا افغان حکومت له دې ټولو ګواښونو سره د مبارزې وړتیا لري او دوی به یې ملاتړ کوي.