زاخېلوال: کډوالو د بېرته ستنېدو ژمنه کړې ده

د ولسمشر ځانګړي استازي او په اسلام اباد کې د افغانستان سفير ډاکټر عمر زاخېلوال په پاکستان کې له مېشتو افغان کډوالو وغوښتل چې خپل هېواد ته ستانه شي. په اسلام اباد کې د افغانستان سفارت له خوا په رالېږل شوې خبرپاڼه کې راغلي چې ډاکتر عمر زاخېلوال پرون خيبر پښتونخوا ايالت ته سفر وکړ او د افغان کډوالو له استازو سره يې وليدل. سرچينې زياته کړې چې د دې کتنې پر مهال د کډوالو استازو د پاکستاني پوليسو له ځورونو شکايت وکړ. د افغانستان سفير دوى ته ژمنه ورکړه چې دا ستونزه به په جدي توګه د خيبر پښتونخوا له مشر وزير او له پوليسو سره شريکه کړي. ډاکتر زاخېلوال د دې ليدنې پر مهال د افغان کډوالو له استازو وغوښتل چې خپل هېواد ته د بېرته ستنېدو تصميم په جدي توګه ونيسي. سرچينې زياته کړې چې دغه راز د کډوالو يو پلاوى به له ولسمشر اشرف غني او نورو حکومتي چارواکو سره د خبرو اترو لپاره ډېر ژر کابل ته سفر وکړي او د کډوالو د ستنېدو پر شرايطو به وغېږېي.