کانګرس: پاکستان د امریکا دوست نه دی او باید بندیزونه پرې ولګول شي

د امریکا د کانګرس د بهرنیو چارو کمیټې په پرونۍ استماعیه غونډه کې له ترهګرۍ د ملاتړ په باب پر پاکستان سختې نیوکې وشوې. د دغې غونډې مشر سالمون د غونډې په پېل کې وویل چې امریکا د سپتمبر له یولسمې وروسته پاکستان ته د ترهګرۍ پر ضد مبارزې په موخه په ملیاردونو ډالره ورکړي، خو هغه هېواد تر ننه د ترهګرو ملاتړ پرې کوي. سالمون زیاته کړې، پاکستان ادعا کوي، چې د ترهګرۍ پر وړاندې جګړه کې ریښتینی دی، خو تېر ۱۵ کلن تاریخ بیا دغه ادعا برعکس ثابتوي. د کانګرس دغه غړي دا هم ویلي، چې پاکستان په ښکاره له هغو ډلو ملاتړ کوي، چې په هند او افغانستان کې جنګیږي او دغه هېوادونه ورانوي. دغه راز د کانګرس یو بل غړي شرمن د پاکستان د پخواني ولسمشر جنرال مشرف څرګندونو ته په اشارې چې ویلي وو، هېواد یې په هند او افغانستان کې له جنګېدونکو ډلو ملاتړ کوي وايي، پاکستان د امریکا دوست نه دی او باید له بندیزونو سره مخ شي.