د کندهار ولايت په ميرويس حوزوي روغتون کي نوي زيږدلي کوچنیان لادرکه کيږي چې د يو شمېر والدينو انديښنې يې را پارولي دي.

بلخوا د میرویس روغتون مسولين وايې چې د زيږون پر مهال دي والدين او د مريض پایوازان دقيق واوسي. د کندهار د ميرويس حوزوي روغتون چې فعاليت يې خورا زيات دى خو دا مهال ددي روغتون د ولادي او نسايې برخي څخه نوي زيږدلي کوچنيان لادرکه کيږي. دا هغه ستونزه ده چې په روان کال کې دوه ځله او نورو کلونو کې هم د مسولينو په وينا رامنځته سوې. په يوې تازه پېښه کې يو کوچنی هلک هغه مهال ورک سو چې يوي نابلدې ښځي ته په لاس ورغلى وو. د ولادي او نسايې برخي مشره د کوچني د ورک کېدو پړه پر والدينو اچوي خو زياتوي چې دوى هم خپل تدابېر ورته نيولي دي. پر همدې مهال د کندهار د ميرويس روغتون سرپرست ډاکتر علي احمد قانع وايې چې رشتيا هم د نويو زيږدلو کوچنيانو ورک کېدل يوه ستونزه ده خو وايې چې ددي ډول پېښو د مخنيوي لپاره دوى تدابېر نيولي دي. هغه وايې والدین هم بايد په داسې وختونو کې د خپلو کوچنيانو ساتنه وکړي او د زيږون پر مهال باوري کسان راولي. هغه وايې چې په تېرو کلونو کې شپږ پېښي له دوى سره ثبت سوي دي. ها خوا د نوي تازه ورک سوي کوچني پلار له دولت او په ځانګړې ډول د ميرويس روغتون له مسولينو غواړي چې د ورک سوي کوچني په پيدا کېدو کې يې مرسته وکړي. هغه له نورو والدينو څخه هم غوښتنه وکړه چې د دا ډول پېښو د مخنيوي لپاره د خپلو کوچنیانو ساتنه وکړي. بايد يادونه وسي چې د کندهار د ميرويس روغتون په ولادي او نسايې برخه کې نژدې هره ورځ له اويا تر اتيا پوري ولادتونه کيږي او سره له دي په ياد روغتون کي د کوچنيانو د ساتني لپاره يو ځانګړى واټ هم جوړ سو.