دولسمشرۍ لپاره کانديدان څه وايي ؟

د سپتمبر  لسمه  ۲۰۰۴

په دې ورځو کي دولس مشرۍ لپاره دکانديدانو  رسمي کمپاين شروع شوی دی  . تېره  شپه مي دکندهار د تلويزيون  له لاري د درو کانديدانو خبري واوريدې . 

ښاغلو کانديدانو يوه :  عبدالستار سيرت ، حافط منصور او سيد اسحق ګيلاني  هر يوه  په خپل وار سره دافغانستان په نړيوال اطلاعاتي مرکز کښي ويناوي وکړې  . دري واړو کانديدانو  تور ولګاوه   چه ګواکي  په اساسي قانون کی لاس وهل شوی دی . او دايې په ګوته نه کړه چه په کومه ماده کښی لاس وهل سويدی  اوڅه ډول بدلون پکښی راغلی دی ، ايا دا امکان لری چه دلوی جرګی په تصويب شوي اساسي قانون  کښي ولسمشر  ، وزيران او يا اشخاص لاس ووهی ؟ .  دا ښاغلی کانديدان به خبر وي چي دقانون اساسي  اصلي مسوده کوم چه د  لويي جرګې   له خوا تصويب  او د ټولو غړو په هغه باندی امضا کړيده  موجوده ده او ممکن دنوموړو کانديدانو امضا هم وي   . دا ديو دوکان يا يو کور قباله نه ده چه لاس پکښي ووهل شي بلکي دا د افغانستان داساسی قانون وثيقه ده . داساسی قانون دانفاذ څخه تقريباً  اته يا نهه مياشتي تيري شويدي ، دلته سوال دادی چه نوموړی  کانديدان دادومره وخت ولی چوپ پاته وه ، چه اوس يې دا بې بنسټه ډنډوری پيل کړی دي .

ښاغلی منصور وويل چي که دی دقدرت ګدۍ ته ورسيږی نو دده لمړی مرستيال به دکابينې رياست مخ ته بيايي ، او دوهم مرستيال به پارلماني چاری مخ ته بيايي ، خپل مرستيالان به يې کاملاَ فعاله رول ولري نه سمبوليک . اما ښاغلي منصور اساسي قانون نه دی لوستلی ، هلته دولسمشر ، مرستيالانو او وزيرانو لپاره وظايف او مسوليتونه ټاکل شوي دي .  ښاغلي منصور اوسنی نظام ديکتاتوری نظام معرفی کړ .  که دا ديکتاتوری نظام وی نو ښاغلی منصور او نور کانديدان  داسي په زغرده خپلی ويناوي  اوبې بنسټه تورونه  د دولتی ډلييزو وسايلو له لاري خپرولای شي ؟  ښاغلی منصور داوسنی دولت پر وزيرانو د چاپلوسۍ  تور ولګاوه . ايا په يوه ديکتاتوری نظام کی داسی  تيری  او تور د رژيم  په وزيرانو څوک لګولی شي ؟

نوموړو درو  کانديدانو ټولي خبري په دري ژبه وکړې ، يوه هم  په پښتو يوه جمله  ونه ويله ، دښاغلي  سيرت ښه روانه  پښتو زده ده ، داسحق  ګيلاني خو مورنی  ژبه  هم پښتو ده ، د منصور څخه خو هيڅ توقع هم نه کيږی .