په کندهار کې ١٥ ورځنۍ پښتو جرېدې په خپرونو پيل وکړ

ټولنيزه ناپيلې پنځلس ورځنۍ خپرونه . مسئول مدير: عبدالاحدترابي _مرستيال : عبدالحميد ترابي .

لاندې ليکنه له نوموړې جرېدې څخه.

                             تر انتخاباتو وروسته د(ملي نهضت ) پلانونه

     زمرى افغان / کندهار

کندهار په دې وروستيو کي د اولسمشرۍ د ټولټاکنو لپاره د کانديدانو د پلويانو له خوا خورا د لاريونونو او غونډو مرکز ګرځېدلى دى. ښايي د کندهار په تاريخ کې به په دومره لږو ورځو کې دومره پر له پسې لاريونونه او غونډې نه وي شوې.

خو موږ له نورو په څنګيږو او يوازي جمهوري رياست ته د کانديد يونس قانونې پر ګوند چې ((ملي نهضت)) نوميږي يو څه رڼا اچوو.

دا ګوند له نن څخه دويې اونۍ وړاندي د نوي ښار په سيمه کي ميرويس روغتون ته نږدې پرانيستل شو، خورا ګڼه ګوڼه په کښې وي، چې ډېر ىکسان په کي راټول وي او د يونس قانون لپاره کمپاين چلوي. پنځه ورځي وړاندي يې د کندهار پوهنتون څلوېښت محصلين راجلب کړي وو. يونس قانوني چي کله راغى نو همدې محصلينو خورا ښه رول ولوباوه، د خلگو له راجلبولو بيا د سټېج تر وياندويي پورې يې ټولې چارې پر مخ وړلې. وروسته بيا همدې ګوند (نهضت ملي) نوموړو محصلينو ته (2500) دوه نيم زره ډالر ورکړل چې محصلينو ته دا شمېره خورا ډېره ښکاره شوه ځکه په ژوند کې يې د لومړي ځل لپاره دومره مرسته تر لاسه کوله. دا چې دوى د دې مرستې له امله په احساساتو راغلي وو، نو يې له همدې دفتر سره د همکارۍ په نيت له يونس قانون او د هغه له مشاور سره ومنله چي د رايي اچولو په ورځ به د نظارت دنده تر سره کوي.

وروسته د الله يار له خوا، چي د يونس قانوني مشاور دى ورته وويل شول چي تاسو به د ټول وخت لپاره زموږ سره کار کوئ، موږ غواړو تر دې انتخاباتو وروسته د ((مسلمان مجاهد)) په نوم يو نوى ګوند جوړ کړو د دې لپاره به تاسو ته يو دفتر جوړوو، هغه به پر کمپيوټرنو برسېره نوري د موټر او انټرنيټ اسانتياوي هم ولري. په دې کي به تاسو د ځوانانو لپاره کار کوئ دا چي تاسو ځوانان ياست نور ځوانان هم ښه جلبولى شئ.

محصلينو هم په جګه غاړه ورسره ومنله چي دا کار به خامخا کوي او تل به د يونس قانوني ملاتړي وي.