افغا نان ملي پخلا یني ته اړتیا لري نه غچ ا خیستني ته !
حکمت الله حکمت _ مالمو سویډن
٢٩_ نومبر _ ٢٠٠٤
پدې کي هیڅ شک نه شته چی افغانان د نړۍ د ډیرو زوریدلو ملتونو دجملې نه دي چي ددرو ورستیو لسیزو په اوږدو کي يې د سرو لښکرو دظلمونو ، د گا و نډیو هیوادو د دښمنانه سیاستونو ، دسړې جگړې د کش ماکشونو او بیا په پردیو پوري دتړلو کیڼ اړخه او ښی اړخو کورنیو گوندونو او ډلو ظلمونو گا للی دی او اوس يې هم گالی.
دنورو تر څنگ دې غمیزي دوه لوی علتونه درلودل چي یو يې کورنی او بل يې بهرنی وو :
بهرنی علت _ زموږ هیواد دخپل جیو پولیتیک موقیعت له مخې تل د لویو قدرتونو د پام وړ و . د همدې کبله وه چی سړه جگړه چې د بر لین ددیوال په جوړیدو شروع شوي وه زموږ په هیواد کي د پخواني شوروي د لښکرو په گونډه کیدوه سره سر ته ورسیده . پدې تو گه سړه جگړه ختمه شوه ولي زموږهیواد لا تر اوسه دنړیوالو د پامه ندی غورځیدلی.
کورنی علت_ دسیاسی گوندونو هغه غلط سیاست چی د بهرنیانو پر لاس جوړیدی او بیا زموږ په هیواد کې د کیڼو او ښیو افراطی گوندونو په سلسله دپر دیو د گټو دساتلو لپاره د ایدیولوژي او یا مذهب تر نامه لاندي عملي کیدی . دغه ډلو د هیواد په دننه او بهر کی ما تی خوړلی خوهره یوه ئ په ټولنه کی د پام وړ نفوذ لری چی په کار نده دپامه وغورځول شي ځکه د هغوی بیا استعمال د پردو په لاس ممکن کار دی.
په پورتنیو دواړو علتو کي د افغان رول د عمل داجرا کونکي په توگه څرگنده دی.
اوس دا پوښتنه را پیدا کیږي چي ولي موږ افغانانو دخپل ټاټوبي سره ددومره میني سره سره بیا هم ورسره دومره جفاوي کړیدي؟
زه ددې پوښتنی جواب داسې څرګندوم .
موږ افغانان تر ځان دنورو سره ډیره مینه لرو ، تر خپل مورني خواږه هیواد دبل هیواد سره دمذهبي ، قومي ،ژبني ، ایدیولوژیکي او یا بل پیوند پر اساس ډیره خواخوږي لرو.
پورتنیو علتونو موږ افغانان په خپلو کي نه یواځي ویشلي یو بلکي یودبل په وړاندي يې دښمنان کړي هم یو.
ددې ټولو نا خوالو سره سره موږ افغانان ملي یووالی او ملي پخلایني ته په اوسنی وخت کی تر بل هر وخت زیاته اړتیا لرو. ددې اړتیا دپوره کولو لپاره باید موږ لاندي ټکي د ملي پخلایني او ملي یوالي د بیا را منځ ته کیدو لپاره د افغاني ملي نورمونو په توگه ومنو او پر ځان يې عملي کړو:
دپردو سره دوستانه خو د افغان سره د ورورۍ داړیکو غوره کول .،
دپردو گټوته درناوی خو خپل د هیواد گټو ته د لمړیتوب حق ورکول.،
یو بل ته د تیرو نا خوالو نه تیریدل او بخښنه خو دنورو مخ نیوی کول.،
د خپل منځي کشما کشونو حل په افغا نی چوکاټ کي نه د بهرنیانو په لاس.،
د ولس له خوا د ټا کل شوي ولسمشر او د هغه دراتلونکي حکومت سره دهیواد په بیا ودانولوکي گټوره ونډه اخیستل نه د تخریب کونکي سیاسي مخالف موضع غوره کول.
زما دا وړاندیزتاسو ته دیو افغان ورور په توگه دی نه دیو نصیحت کونکی په توگه، ځکه نو دگرانو مشرانو افغاني وروڼو او خوندو نه د بخښني په غوښتلو سره خپله لیکنه پای ته رسوم!
څنګه چي داليکنه بېنوا خپرنيزي څانګي ته ارواښاد علامه رشاد بابا دوياړ څخه د ډک ژوند په وروستۍ شپه رسيدلې وه ، خپرول يې د ارواښاد استاد د غم او وير د ماتم په مناسبت وځنډيدل ، هيله ده ښاغلی ليکوال مو عذر ومني . په درناوي :
