د علامه بابا (رح ) جسمي ابدي بيلتون د هيواد په دننه او دباندي کښي د ډېرو مخلصانو او ارادتمندانو وير لړلي زړونه ټوکر ، ټوکر کړل ، ددغه ويرجنو زړونو سپېڅلي ميني او تودو جذبو د سرامنو اوښکو په څپو کښي له ليري او نژدې څخه خپل د خواخوږۍ احساس او پيغامونه را وليږل . ددغه وير د څرګندتيا تر څنګ د علامه بابا (رح ) د ناچاپو قلمي اثارو د چاپ او د کتابونو د خوندي کېدو په اړه د ګروم او تشويش سره ، سره د هر ډول مرستي ، بسپني ، ونډي او منډي له پاره ځيګرونه وټکول سوه .
ددوی د خواخوږۍ او پېر زويني څخه د منني او کور وداني په څنګ کي په دې فکر کي ډوب سولو چي ددې لوی کار د سمبالتيا او ددې ټولو خواخوږو د احساس اوغوښتنو په وړاندي څه بايد وکړو ؟
د مرګي نامرادي څپېړي که علامه بابا (رح ) جسماً زموږ څخه يو وړ ، خو زموږ په زړونو کښي د تلپاتي ډېوې په بڼه بل او وړانګين دی .
راځئ چي ددوی ( ارواښاد علامه بابا (رح ) ) د پله دوړي د تبرک له پاره د لېمه رانجه کړو ، تر څو ددوی د لويي پېرزويني ، لويي حوصلې ، څېړنيز هاند ، ځلانده استعداد ، سياسي درايت او متانت ، د نفس مناعت ، د هيواد ولس او بشر سره د ژ وري ميني د زور واکو او تيري څخه د کرکي ، پر اصولو د کلک ټينګار ، د نېکمرغه لمر وړانګي پر موږ ټولو وغوړيږي او ددغه نېکمرغه لمر په برکت تتي او تيارې لاري رڼې ، کرکجن زړونه مينه ناک ، تاش په تاش او متشتت فکرونه سره يو ، غچ غوښتونکي هڅي په لورېني او پېرزويني باندي واړوو .
د ارواح ښاد علامه رشاد بابا (رح ) د روح د خوشالتيا او ددوی د لويو ارمانونو د پوره کېدو له پاره د ادبي او سياسي نوابغو ، علماوو ، پوهانو او ښوواندو د روزني په درنه غېږه ، دافغانانو په جګه شمله ، د کندهار په لرغوني ټاټوبي کښي د يوې داسي علمي اکاډيمۍ ( علامه رشاد اکاډيمي ) بنسټ کښېښول سي چي د ادبي _ فرهنګي هلو ځلو په لړ کي به لوی کتابتون ( د علامه بابا (رح ) او نورو حقدارو کتابونه به په کښي خوندي وي ) ، څېړنتون ( رشادپوهنه ، حبيبي پوهنه ، بېنوا پوهنه ، خادم پوهنه ، الفت پوهنه ، رښتين پوهنه ، خوشال پوهنه، رحمان پوهنه ، حميد پوهنه ، غني پوهنه ، کامل پوهنه او نوري څېړنيزي برخي به يې موخه وي ) ،خپرندويه څانګه، ( د علامه بابا (رح ) او نورو حقدارو دکتابونو چاپ ) ، ژباړنتون (د پښتوژبي بډای ادب او ستر پوهان نړۍ ته په بهرنيو ژبو ور پېژندل ، او له بهرنيو ژبو څخه ادبي شهکارونه او تاريخي اثار پښتو ژبي ته را اړول) او نوري برخي ولري .
دا اکاډيمي به دکار د سمبالتيا لپاره يو مشر ، علمي جرګه ګۍ ، او غړي لري چي د هيواد دننه او دباندي پوهان ، ليکوال ، شاعران ، او څېړونکي به يې بالذات يا بالواسطه ددې جرګه ګۍ غړي وي .
د اکاډيمۍ لويه موخه به د علامه بابا رح او نورو حقدارو د کتابونو چاپ او ولس ته رسونه وي ، چي دا لوی او دروند کار د معنوي او مادي پلوه د درو يا څلورو تنو په وسه نه دي ،. ددې سپېڅلي کار لپاره به ادبي کچکول ګرځول کيږي، معنوي او مادي مرستي به راټولليږي ، هره پېزوينه به د ادب پر ټولو مينانو او په ځانګړې توګه د ارواښاد علامه بابا(رح ) پر کورنۍ باندي لوی منت وي .
ددې اکاډيمۍ اولوی کتابتون د ودانۍ له پاره به د مځکي مرستي ته دولت غاړه ايږدي ، د ودانۍ د جوړيدو ونډي ته به په هيواد کي فرهنګپال او پر ادب مين سوداګر او شخصيتونه او تر هيواد د باندي د ژبي اوادب د بډايني سره لېوال افغانان او بهرنيان رابلل کيږي .
د ونډي او بسپني د راټولولو او پر ځای لګولو له پاره به دقيق سيسټم جوړيږي چي د ځينو ( N G O's ) غوندي په خورجين به يې باد نه ننوزي . دهري اوغانۍ ( افغانۍ ) راټولونه او لګښت به يې د اکاډيمۍ په وېبپاڼه کښي ثبت ، په خپرنيزو رسنيو کي چاپ ، او د مينه والو تر درانه کاته پوري رسيږي .
او اکاډيمي به خپله کړنلاره ، تګلاره ، او تشکيل لري .
البته! ټوله پورتنۍ چاري په يوه پلا او د سترګو په رپ کي ترسره کېدای نه سي ، سوکه ، سوکه ، د مېړنو د سپېڅلي ميني او تودو جذبو له فيضه او د پرله پسې معنوي او مادي مرستو او بسپنو په برکت به دا اوږده مزلونه لنډو ، له کوچنيو هيلو څخه به د لويو موخو ( هدفونو ) پر لور ګام اخلو او وده به کوو .
د ټولو خواخوږو او مينه والو د نظر لوستو او اوريدو ته سترګي په لاره يو .
