ســعــيد لـــــودين

سعيد لودين يو له هغو ځوانو شاعرانو څخه دی چي  پر هيواد راغلي غميزي نه يوازي په خپله غېږه کي له زده کړو بې برخي کړ ، بلکي لکه د نورو ډيرو په شان يې پردېسۍ ته اړايستلی دی .

زما سره هغه څه نه وه لکه نور چي يې په خپلو ژوندليکنو کي ليکي چي لومړۍ زده کړي مي هلته ، منځنۍ مي دلته او په لوړو زده کړو په پلانکي ځای کي بوخت يم .

خو تر دغه دمه چي څه لرم هغه به دلته وليکم.

نوم مي سعيدلودين  د حاجي خالقداد  زوی د ۱۳۵۸هجري لمريږ کال د غويي د مياشتي پر۲۲ چي د هيواد  د ستري غمېزې لومړۍ ورځي وې د کندهار په ده خواجه کي  و دې دنيا ته راغلئ يم .

څه وخت چي مي د ښوونځۍ وختي سوې په هيواد کي بل اور د کندهار ټولي ښوونځياني سوځلي وې او څه چي پاته وې پر هغو باندي يې د کفر ټاپې وهلي وې خو په کور کي مور مي د قلم له نيولو څخه نيولې بيا د کتاب تر لوستلو پوري چي څه يې په وس وه راښوولي دي .

 په۱۳۶۳ کي  د نورو هيوادوالو په څېر موږ هم پاکستان ته رامهاجر سوو  دلته ګواکي ماته په ټولګۍ کي د څه ويلو موقع برابره سوه . د کراچي په افغاني تنظيمي مدرسو کي مي تر لسم ټولګۍ پوري لوست وکړ. څه وخت چي دغو تنظيمونو  و چوکۍ نيولو او د ګران هيواد  و نورو ورانولو ته لېڅي راونغاړلې نو دغه مدرسې هم پر ډاګ پاته سوې او له څه مودې وروسته بندي سوې خو په۱۳۷۲ کي د ګران هيواد زړه دردونکو او وحشي حالاتو او له شعر سره ميني مي له خپلي  ژبي سره نور هم نېژدې کړم او خپل لومړی شعر مي پکښي وويلئ . شعرونه  مي کله کله په طلوع افغان  او نورو خپرونو کي هم خپاره  سوي دي .

که څه هم د هيواد ناخوالو  مي د هيواد په ښوونځيو ارمان ونه کيښ  خو په مهاجرت کي به مي د زيارکښو پښتنو فرهنګپالو په  کتابونو  تنده ماتېدله او پر څنګ مي د کمپيوټر کورسونه هم ورسره تعقيبول . په ۱۳۷۴ کي د کوټي  ښار د مهاجرو د خيريه روغتون په لابراتوار کي د ډاکترانو د مرستيال په توګه  په وړيا کار کړئ دئ .

د شعرونو  لومړۍ مجموعه مي تر لاس لاندي ده او ډېره ژر به يې چاپ کړم او  په هندوستان کي د ستر پښتون ، زړور سپه سالار  خان جهان لودي د ژوند او کارنامو کتاب چي  ( خان جهان لودي ) نومېږي د بيا چاپولو له پاره مي تر لاس لاندي دئ .کله کله له انګليسي يا اردو څخه ترجمې هم کومه  . له  کال ۱۳۷۶راهيسي  د کاناډا د ټورنټو په ښار کي اوسېږم.

دښاغلي لودين دشعرونو بېلګي :