د رهين په وړاندي د کابل لاريون څه شي وهڅاوو؟

 د کب په ٢٤مه نيټه په کابل کي د افغانستان د اطلاعات او کلتور وزير، مخدوم رهين، په وړاندي يو لاريون تر سره سو چي د هغۀ د بيلابيلو نادودو لامله يي  له مشرو چارواکو وغوښتل چي رهين له دندي ګوښه کړي او په ځاي يي يو ريښتيني افغان او ملي شخصيت راولي.  کارجنو مظاهره چيانو رهين د دولتي رسنيو، په ځانګړي توګه دتلويزون او راډيو، په ناوړه کاروني تورن کړ.

په ښاغلي رهين باندي له اوږدي مودي راهيسي پراخي نيوکي کيدي چي ددې په ځاي چي ازادو ډله ئيزو رسنيو ته وده ورکړي هغوي سانسوروي او په خپله خوښه يي برابروي.  ددۀ په وړاندي دا دريم په پرتليزه توګه ستر لاريون دي چي ددۀ د وزارت چلولو په موده کي ترسره کيږي.  په  پروني لاريون کي په سلګونو کابل ښاريانوچي ډيري يي ددۀ د پخوانۍ ' شورا' غړي وو ګډون کړي وو.

له لاريون کونکو نه به يي واورو:

لاريون کونکو خپله مظاهره د شاه دوشميره څخه پيل کړه او ارګ ته نږدي په پښتونستان څلورلاري کي سره غونډ سول.  دوي ويل د رهين کړنلاري د دموکراسي او ولسواکي د آرونو پر خلاف دي ځکه چي دي هڅه کوي دولتي رسنۍ تر خپل نيواک لاندي وساتي.   د دوي غوښتنه له ولسمشر کرزي نه د رهين ژرترژره ګوښه کول وو چي تر اوسه پرې چا غوږ ندي ګرولي.

لاريون د کابل د ښاريانو د شورا لخوا په لار اچول سوي وو.  رهين تر څو ورځو مخکي دهمدې شورا په خپل سر ټاکلي سوي مشر وو چي تر اوسه ډاګيزه نده ولي دي له هغې نه واويستل او يا وشړل سو.  که څه هم رهين ادعا کوي چي دۀ په خپله خوښه شورا پرېښوده خو پرون د لاريون کونکو خبرو داسي ښوده چي کومه شخړه يي تر منځ وه.

يوو لاريون کونکي ويل: (( رهين ټول تلويزونونه او راډيوګاني په خپله ګټه را څرخوي)).  بل ويل: (( رهين راډيو او تلويزون سانسوروي او دا خپله د دموکراسي په خلاف يو کار دي )).  بل بيا ويل: (( اوسنې حکومت دخلکو او ملي حکومت دي، حکومتي تلويزون او راډيو هم بايد ملي او دخلکو وي، نه داچي د يوو سړي په طبعه)).

د مخکينيو مظاهرو پايله؟

د رهين په وړاندي لومړي لاريون  د ١٣٨١ کال د زمري په مياشت کي ترسره سو چي هغه وخت مظاهره چيانو ددۀ د ګوښه کولو لپاره په تاوتريخوالي لاس پوري کړي وو او د اطلاعات او کلتور وزارت د ودانۍ شيشي يي په تيږو ويشتلي وي.  خو هغه مهال رهين په غبرګون کي اعتراض کونکي خپل شخصي دښمنان او وراني کونکي  وبلل.  دا لاريون  په پخوانۍ لنډمهاله اداره کي  د رهين له ټاکلو لږ موده وروسته پېښ سو چي د مظاهره چيانو غږ چا وانه وريدۀ. 

دويم لاريون د ١٣٨٢ کال د چنګاښ په مياشت کي بيا هم د اطلاعات او کلتور وزارت مخ ته ترسره سو چي  د رهين ګوښه کيدل يي غوښتل. هغه مهال لاريون کونکو رهين د يوي ورځپاڼه چلونکي په ملاتړ نيوکه کوله چا چي په دموکراسي کي د اسلام د ونډي په هکله پوښتنه اوچته کړي وه او، دستري محکمي په وينا، دين ته يي له سپکاوي ډکه ليکنه ليکلي وه.  ويل کيږي رهين هغه وخت د آفتاب ورځپاڼي ايراني چلونکي، حسين مهدوي، سره مرسته کړي وه ترڅو د څارنوالي له  نيونځي نه پښي سپکي کړي او له هيواده بهر ولاړ سي. په دې ډول اسلام ته د سپکاوي په تورونو د مهدوي په محاکمه باندي خوله پټه سوه.  خو هغه وخت هم هيچا د رهين د ګوښه کيدو او د محکمي د فتوا له مخي له 'بيدينانو' سره د هغه د مرستي په اړه چا سر ونګرزاوه.

داځلي به وګورو چي ولسمشر کرزي چا چي يوه رايه له رهينه او په ميلونونو رايي له ولسه اخيستي  د خلکو غوښتنو ته څه ډول ځواب وايي ؟!