کرزي د ملي سرود سر وخوړ

 محمد حسن حقيار

دا يوه څرګنده خبره ده چې، په هرهېواد کې بېلابېل قومونه او دبېلابېلو ژبو خاوندان ژوند کوي   اوڅوک چې،  ديو هېواد تابعيت ولري او   تبعه يې وګڼل شي نوله ټولو هغو حقوقو څخه په مساوي ډول برخمن وي چې، اساسي قانون دهغه هېواد داتباعو لپاره  ټاکلي وي او ټول په مساوي ډول ددولت او حکومت په وړاندې هغه مکلفيتونه اومسؤوليتونه هم  لري چې، اساسي قانون يې دخپل هېواد له اتباعو څخه غواړي٠ دې قومونوکه څه هم خپل منځۍ ريښې يې بېلې اوځانته ځانته قبيلې وي خو په ګډه يې يو ملت  جوړ کړى وي  او په بهر کې بيا يو نوم ، يو ملي هويت اويو ملي سرود لري چې ، داملي سرود هم دهغه ملت دملي هويت څرګندوى بلل کېږي.

دټولې نړۍ تعامل، دانصاف غوښتنه ،اود دموکراسۍ اصول دادي چې ، دملي سرود ژبه دهېواد داکثريت ژبه وي خو له بده مرغه چې، په افغانستان کې بيا ددموکراسۍ مدعيان  بل ډول اصول تطبيقوي   دلته نه ددموکراسۍ ارزښتونو ته څوک اهميت ورکوي او نه داکثريت حقوق څوک په پام کې نيسي ، دلته دموکراسي زندۍ شوې ،دلته اوس هم دټوپک او کوتک واک او حکومت دى،دلته نه څوک اساسي قانون په نظر کې نېسي او نه مدني او ٠٠٠

 افغان ولس دتلې دمياشتې په ټول ټاکنو کې  په حامد کرزي اعتبار وکړ،  هغه ته يې ديو لړ ژمنو په بدل کې چې ، حق به حقدار ته سپاري  دتصميم نيولو تر ټولو لوړه څوکۍ ( ولس مشري )ورکړه خو کرزي واک ته تر رسېدلو وروسته خپلې ژمنې هېرې کړې  او دملت په رايو بريالي شوي ولسمشر له ملت سره دښمني پيل او دملت دهيلو او غوښتنو پر خلاف يې  بېرته  دولس دښمنانو ته خپله غېږه پرانسته٠

 ددموکراسۍ، حقدار ته دحق دسپارلواود ټوپکسالارۍ دختمولو  ژمنې يې هېرې کړې .

دنوي اساسي قانون دتصويب په لويه جرګه چې، د١٣٨٢ دليندۍ له دوه ويشتمې يې  دمرغومي ترڅوارلسمې  دوام درلود  دافغانستان دملي يووالي ،افغانيت اودافغانستان د مځکنۍ بشپړتيا دښمنان له هرڅه ډېر په دې   پورې نښتي وو چې، په افغانستان کې دې نه  ملي ژبه پښتو  وي اونه دې ملي سرود په پښتو ژبه   وي، دوى ښه پوهېږي چې، په افغانستان کې ، دپښتنو سلنه تر شپېتو اوړي، دوى ښه پو هيږي چې، دافغانستان عنعنوي وارثين پښتانه دي ، دوى ښه خبر دي چې دتاريخ په اوږدو کې  افغانستان دپرديو له يرغل څخه پښتنو ژغورلى دى  او پښتو له هره لحاظه مستحقه ده  چې، ددې هيواد ملي اورسمي ژبه وي خو دتعصب او نژاد پالنې ګردونو دومره ړانده او کاڼه کړي وو چې ، په دې ټولو واقعيتونو يې سترګې پټې کړې اودپښتو په وړاندې يې وچ کلک غير منطقي دريځ   ونيوه ، خو په مقابل کې يې پښتنو وکيلانو دملي يووالي  دټينګښت لپاره له ډېرې حوصلې او ډېر زغم څخه کار واخست  ، ډېر انعطاف او تنازل يې وکړ،دپښتو دملي ژبې  کېدلو له وړانديز څخه تېر شول او په همدې يې اکتفا وکړه چې ، ملي سرود دې په پښتو وي او دا يې دهمدې اساسي قانون شلمه ماده وګرځوله : ((دافغانستان ملي سرود په پښتو ژبه دى ، الله اکبر او دافغانستان دقومونو نومونه به پکې راځي.)) 

دقانون له تصويب وروسته اټکل کېده چې، کرزى به داساسي قانون له غوښتنې سره سم دملي سرود دجوړولو لپاره بېړنى ګام واخلي خو له بده مرغه چې ترڅومياشتوخويې دسرود لپاره آن کمېسيون هم نه ټاکه .کله چې،چې  پرې دولس  له خوا فشار راغى نو دا سې يوکمزورى کمېسيون يې وټاکه چې له يوڅو تنو پرته  يې نورو   آن ملي سرود پېژنده هم نه ،نه يې په مانا پوهېدل او نه يې په اهميت،خو کله چې دده له خوا همدې ټاکل شوي کمېسيون  يو شعر_ چې که څه هم دقومونو انډول او سلنه په کې مراعات شوې نه وه او تر هر چاوړاندې په کې هزاره او په شپږم نمبر کې پښتانه ياد شوي وو چې، دا  په خپله هم  يوه لويه بې انصافي ده _   وټاکه او دکرزي دفتر اعلان کړه چې ، کرزي همدا شعر ومانه نو خلک همدې ناانډوله شعر ته ځکه خوشحاله ووچې، دادبسوګۍ واده خلاص شي او  هيواد مو ديو ملي سرود خاوند شي خو دادى کرزي يو ځل بيا دملت په ولولو تودې اوبه وشيندلې ، دهغوى احساسات يې مړاوي کړل او له خپل خوى سره سم له دې خبرې هم واوښت او دنوي کالدجشن په غونډه کې يې يو ځل بيا هماغې ګوندي ترانې ته داحترام مراتب پر ځاى کړل دا هم ديادولو وړده چې، جناب کرزى صاحب دعظيم الشان قران احترام ته ونه درېد خودجمعيت تنظيمي ترانې ته چې دملت د خوښې او هيلې پرخلاف، خپره شوه په پوره عاجزۍ او احترام ودرېد

  دادى داساسي  قانون له تصويب څخه  يو کال اودرې مياشتې تېرې شوې نه ملي سرود په پښتو شو او نه   دجمعيت هغه ګوندي ترانه ورکه شوه چې ،نه په کې دافغانستان نوم ياد شوى، نه يې ويونکى او نه يې جوړوونکى معلوم دى، نه يې دجوړولو لپاره شاعرانو ته دکوم کانکور اعلان شوى، نه يې دميوزيک دثبت لپاره هنرمندانو ته کوم کانکور اعلان شوى ، نه کومې لويي جرګې خو پرېږده آن کوم کمېسيون تصويب او تائيد کړى دى.

 دملي سرود دکميسيون  يوتن غړي يوه آژانس ته ويلي دي چې، کله کرزي دا نوى سرود رد کړنودوى داحتجاج په ډول کرزي ته ورغلل  کرزي ورته په ځواب کې ويلي وو چې،استاد رباني دا سرود نه مني او وايي چې ددوى دمقاومت[ چې ، په پايله کې يې  دامريکا د٥٢ ډوله الوتکو په وزرونو کابل ته راغلل] يادونه په کې نه ده شوې . دافغانستان دحالاتو څېړونکي  وايي چې، رباني او دده هم آنده ملګري اصلاً په پښتو ژبه  له ملي سرود سره مخالفت  لري او په هېڅ ډول يې  نه غواړي دوى کوښښ کوي چې ،داسرود نن په سبا وځنډوي  او ترهغې يې وځنډوي چې ، پارلماني ټاکنې ترسره او  ملي شورى جوړه شي  ځکه له ده ( رباني ) سره کرزي دملي شورى درياست   ژمنه کړې ده نو کله چې دى دملي شورى رئيس شي نو له خپل نفوذ ، تجربو ، چالاکۍ او٠٠٠٠څخه په کار اخستلو به  همدا موجود دده ملي سرود ( جميعتۍګوندي ترانه ) دده په ګومان دتل لپاره په خلکو ومني او دافغانستان ملي وحدت او ملي هويت ته به ښه خدمت وکړي !!

نو اوس قضاوت ددرنو لوستونکو په لاس کې چې ووايي  ددوى لخوا دټاکل شوي ولسمشر په استدلال کې څومره قوت پروت دى؟! آيا دولس لخوا ټاکل شوى ولسمشر همداسې وي؟!ايا په پارلماني ټاکنو کې به بيا  دده لپاره خپلې وينې تويوي ؟