پر عراق د امريكې د بريد اساسي لامل

خيبر – ماسکو ٢٥ وری ١٣٨٤

د روسيې غږ راډيو: په عراق كې د ملګرو ملتونو د موسسي د وسلو د لټوني د څارونكو ډلي پخواني مشر، هانس بيلكس، په همدي ورځو كي يوه ډيره پام را ګرځوونكي اعلاميه خپره كړي ده. هغه په دغه اعلاميه كې وايې چې پر عراق باندي د امريكي د متحدو ايالتونو د بريد اساسي لامل تيل و.

په دي اړوند د روسيې يوه سياست پيژندونكي، ويكتور ناديين رايفكسي، څو ورځي مخكې د «روسيې غږ راډيو» سره په يوه مرکه وويل:

په واقعيت كې د امريكي د متحدو ايالتونو ټول كړه وړه تر هر څه د مخه په نړۍ كې د خپلو مالي او اقتصادي گټو پياوړي كولو ته متوجه دي. او په لومړي سر كې د تيلو ګټو ته .

د واشنګتن هلي ځلي د هغه څه جوړولو ته متوجه دي، چې امريكايان يې د امريكي د متحدو ايالتونو لپاره د انرژۍ د تامينولو په ساحه كې د امنيت د سيستم په نامه بولي. او نن ورځ له تيلو او ګاز پرته د انرژۍ داسي سرچيني نه ليدل كيږي چې غټ حسابونه پري وشي.

د امريكي متحد ايالتونه، پر دي باور لري چې دوی يوازنی هيواد دي چې د نورو د اداره كولو وس ور سره شته. او لكه چې ښكاري په همدي دوي داسي ګڼلي چې د دي لپاره ډيره مناسبه موقع په لاس ورغلي چې د تيلو د نړيوالو سرچينو د خپلولو په خاطر بي رحمانه مبارزي ته لاس واچوي. او په همدغه لاره كې لومړني ګام، پر عراق باندي بريد وګرځيد. نو ځكه، هانس بليكس، كله چې د دغه بريد پر عواملو غږيږي، په حقه دي.

وياند: چې داسي ده، نو د امريكي د متحدو ايالتونو د دغو ګن شمير اعلاميو مفهوم څه دی، چې ګوا كې دوی د عراق او نورو هيوادونو د ديموكراتيزه كولو هڅه كوي؟

ځ: د ديموكراتيزه كولو خبري، دا يوازي پرده ده. پر عراق باندي د امريكې بريد په دې پلمه وشو چې ګوا كې عراق د ډله ييزي وژني وسله لري. خو كله چې څرګنده شوه چې دغه ډول وسله په عراق كي نشته، نو د يرغل د پټولو لپاره نوي پرو پاګنډي پرده وړاندي شوه. د استبداد پر ضد او د ديموكراسۍ په خاطر مبارزه. اوس واشنګتن نه يوازي د عراق، بلكي د ستر منځني ختيځ او د نړۍ د نورو سيمو د ديموكراتيزه كولو د ضرورت خبري هم كوي. د واشنګتن دغو ديموكراتيزه كوونكو پر عراق  سر بيره، ايران، سعودي عربستان هم تر خپلي پاملرني لاندي نيولي دي او په همدي ځای كي هم د تيلو ګټي په ډاګه ښكاري. خو په پاي كې دا هم بايد وويل شي، چې د امريكي د ستراتيژي جوړونكو كارونه هغسي هم پر مخ نه ځي لكه چې دوی يې پلانوي . دا دي څه د پاسه دوه كاله كيږي چې په عراق كې د امريكي د نيواك پر ضد مقاومت روان دي او پای يې تر اوسه نه ليدل كيږي .