نـــه بـــدلـېږمه افغان يم، څو چې يـــم
زه د ګران افغانستان يم، څو چې يم استاد رفېع
د يوه هېواد په رښتينو ارزښتونو كې: ملي ژبه، ملي كلتور، ملي سرود، ملي بيرغ او... راځي چې د هماغه هېواد اوسېدونكي ورته درناوى لري، ساتنه، پالنه او دودونه يې خپله ملي دنده ګڼي.
افغانستان هغه هېواد دى چې تل د مغرضو هېوادونو، په ځانګړې توګه ګاونډيو هېوادونو د پټو او ښكاره موخو، نيتونو او دريځونو له كبله ځپل شوى، ملي ارزښتونو ته يې سخت زيان وراړول شوى دى.
په دې وروستيو كې د افغانستان زيات ملي او رښتيني ارزښتونه له ستر ګواښ سره مخ شول، چې بيا هم ګاونډيو هېوادونو بېلابېلې پروژې او ستراتيژيك پلانونه پلي كړل، په افغانانو كې يې قومي، سيمه ييز او ژبنيز تعصبونه راوپارول، كله يې ملي مشران ورته وښكنځل او دا دى اوس يې په نورو ارزښتونو پسې هم رااخيستې ده.
افغانان ډېر سپن او سپېڅلي زړونه لري، چې ډېر ژر پر هر څه باور كوي، هغه مهال چې له اسلام اباد څخه خيبر ټي. وي په خپرونو پيل وكړ، نو زياتو افغانانو يې هركلى وكړ، آن چې ډېرو بېوسه افغانانو به د دې ټلويزيون چلوونكو ته ټليفونونه كول او مباركي يې وركوله.
كله چې په افغانستان كې د كلتور وزارت په ځانګړي امر سره پر دې ټلويزيون بنديز ولګول شو، زياتو افغانانو پر دې كار نيوكه وكړه او په دې باور وو- كه خيبر ټلويزيوني چينل بندېږي، نو دا په لسګونو ايراني چينلونه دې هم بند شي.
په دې وروستيو كې د افغانستان يوه ملي ترانه، چې د افغانانو واړه ماشومان هم ورسره بلدتيا لري او دا ترانه د هر افغان په اروا او رګ- رګ كې غزونې كوي، د خيبر ټلويزيوني چينل له خوا بدله كړل شوې ده، حال دا چې افغانان د جنون تر حده ورته درناى او ورسره مينه لري او له شل- پنځه ويشتو كلونو راهيسې د افغانستان په راډيو- ټلويزيون او نورو ږغيزو رسنيو كې خپرېږي. په ټولو افغانانو كې يوه منل شوې ملي ترانه ده، چې په بهر كې مېشت افغانان د همدې ترانې په اورېدو اوښكې تويوي:
دا زموږ زېبا وطن
دا زموږ ليلا وطن
دا وطن مو ځان دى
دا افغانستان دى
د خيبر له لوډسپيكرونو څخه يې دا بڼه خپره شوه:
دا زمونږ زيبا وطن
دا زمونږ ليلا وطن
دا پر مونږ ډېر ګران دی
ښكلی پاكستان دی
ټول افغانان دا كار په كلكه غندي او د ستر ملي شاعر ارواښاد ملنګ جان په شعر كې دا لاسوهنه او سپين سترګي د دې ټلويزيوني شبكې يوه ستره جفا ګڼي او د خيبر ټي. وي له چلوونكو څخه په ټينګه غوښتنه كوي چې بخښنه دې وغواړي، كنه افغانان به يې دا خيانت په نړيواله كچه رسوا كړي.
هيله ده هغه افغانان چې لږ تر لږه ځانونه افغانان ګڼي او له خپلو ملي ارزښتونو سره مينه لري، د خيبر چلوونكو ته دې د برېښناليك پر دې پته برېښناليك ولېږي: webmaster@avtkhyber.tv او د خپلو ملي ارزښتونو دفاع دې وكړي. ځكه هغه څوك چې افغان او افغانستان نه مني، هغه د كوم حق له مخې د استاد اولمير په ږغ كې ويل شوې دا ملي ترانه بدلوي او د پاكستان تورى ورزياتوي؟؟؟ كوم پاكستان، هغه چې زموږ د هېواد په ورانۍ كې لوى لاس لري؟ كوم پاكستان هغه چې زموږ فابريكې يې د كباړ په نامه رانيولې او هرڅه يې راڅخه تالا ترغه كړل؟ داسې ښكاري چې اوس يې ګران افغانستان په ملي او افغاني ارزښتونو پسې رااخيستې ده، چې هېڅكله به يې هم دا پلان پلى نه شي.
كه رښتيا هم پر دې ترانې باندې د پاكستان ورتپل يو روا كار واى، دا كار به پخوا د استاد اولمير له خوا كېداى، چې په خپله د پېښور و.
بله ورځ به خيبر چلوونكي د خوشال بابا له شعرونو څخه هم د افغان توري باسي او پاكستاني به ورسره زياتوي؟!! د ستر رحمان بابا له شعرونو څخه به هم د افغان تورى باسي؟ د پښتو غزل د پلار امير حمزه شينواري له شعرونو به هم د افغان تورى باسي او پاكستانى به ورزياتوي؟
د افـغــــــان په ننګ مـــې وتړله توره
ننګيالى د زمانې خوشال خټك يم
ستر خوشال بابا
***
ما كوز ورته لېمه كړ، زمـــــــا سر نه ټيټېده
شايد چې په الفت كې هم افغان پاته كېدم
حمزه بابا
د افغان او افغانستان د سرلوړۍ، بريا او نېكمرغۍ په هيله
د هوسۍ مجلې اداره
پوست بكس شمېره ۶۳۳
كابل- افغانستان
