کندهار ننداره

١٣٨٤ د غويي ٣٠مه

ضيا ساحل - کندهار

کندهار ننداره د يوشمېر ځوانانو په ابتکار او نوښت چي مشري يې ښاغلي فضل احمد انيس په غاړه لري ١٣٨٣ کال د کب په مياشت کي پرانستل شول.

نوموړې ټولنه د کميت او کيفيت په لحاظ اوسمهال په لومړني حالت کي ده چي ټولټاک ٢٨ تنه غړي لري.

که څه هم هنر و تمثيل پر ځانګړي ذوق او علاقې سربېره مسلکي زدکړو ته هم اړتيا لري خوله بده مرغه د ټولني ټول غړي د دوى له کوله د وخت او شرايطو له وجه د هرډول مسلکي زده کړو څخه بې برخي دي خو تمثيل او فعاليت يې بيا د خلګو په زړونو کي ډېر ځاى نيولى دى.

 د نوموړي ټولني د موخي په اړه د ټولني مشر ښاغلى انيس وايي:  زموږ ټولنه يوه آزاده ناپيېلې ټولنه ده چي موږ غواړو د هيواد په کچه د هنر په برخه کي تياتر،ډرامو او داسي نورو برخو ته کار وکړو او د ټولني ناخوالي د ټولني غړو ته د تمثيل په ډول وړاندي کړو.

د کار او فعاليت له اړخه يې تر اوسه پوري د کندهار آزاده راډيو له لاري لس راډيويي بېلابېلي ډرامې، همدا ډول په يو نيم نورو پروګرامو کي  پر بېلابېلو ټولنيزو پېښو باندي د سټېج ډرامې په خپل زيار وړاندي کړي دي. د دوى له کوله په راتلونکي کي به د کندهار راډيو ټلويزيون سره هم د ځانګړو پروګرامونو په جوړولو کي مرسته کوي.

څه موده مخکي د ټولني مشر ښاغلي انيس راته وويل چي پر يو هندي هنري فلم مي د پښتو ژباړي کار پيل کړى دى چي هغه يې هم اوس پايته رسولى دى خو د تخنيکي وسايلو د نه شتون له امله يې ټول ډيالاګونه د سپين کاغذ پرمخ پاته دي.

د ټولني سره د مرستي په اړه د ټولني مشر ښاغلى انيس وايي: زموږ سره تر اوسه پوري يوازي بېنوا فرهنګي ټولني يونيم مرستي کړي چي عبارت له همدې ځاى څخه چي موږ دفتر پکښي جوړ کړى دى،يوه پايه کمپيوټر،د کمپيوټر مېز دي چي موږ ورته د منني نه پرته بل هيڅ نه لرو. او په همدې ډول د روشن ګرځنده موبايل کمپنۍ له خوا د ښاغلي نظري صاحب په اړه د وياړ غونډي  لپاره د هال د کرايې لګښت په غاړه واخيست. خو نوري د يادوني مرستي زموږ سره تر اوسه چا نه دي کړي، کوم لګښت چي دلته کېږي هغه د همدې ټولني د زيارکښو او فدايانو غړو له جېبه کېږي.

د ټولني  له مشر ښاغلي انيس څخه مي و پوښتل: دا چي ستاسو ټول غړي هيڅ ډول مسلکي زده کړي نه لري دابه ستاسو د کارونو په پرمختګ کي کوم خنډ را نه ولي ؟

هغه په ځواب کي و ويل: څرګنده خبره ده چي مسلکي زده کړي ډېري اړي  د نه زده کړو له امله به زموږ په پرمختګ کي هرومرو خنډونه راځي،راغلي دي، او رابه يې هم ولي،موږ تر اوس مهاله خپلي زده کړي د خپلو تجربو څخه کړي دي. خو په ټولنه کي نه يوازي د دې خنډونو سره مخ يو بلکي  بې شمېره نور خنډونه هم سته. لمړى خو خلګ که څه هم فلم،ډرامه او داسي نور اړوند شان ډېر خوښوي خو له بلي لوري يې بيا د هنر مند څخه ډېره کرکه ښکاره کوي يا د ډم نوم پر ايږدي او يا يې هم په نورو نومونو تحقيروي و تحديدوي. لکه څنګه چي تاسو ته هم څرګنده ده د ډرامې يا تمثيل موضوعګاني  ډېرى د ټولنيزو پېښو پر محور راڅرخي او په ټولنه کي نارينه و ښځينه دواړه ژوند کوي خو له بده مرغه موږ بايد په تمثيل کښي يا هيڅ د ښځي ونډه و نه لرو او يا به هم نارينه د ښځي په ډول جوړوو. خو له نېکه مرغه موږ اوس درې تنې همکاراني پيداکړي چي عمرونه يې تر اتو کالو نه اوړي، پلار يې څه موده مخکي راته و ويل چي اوس خو لا کچنۍ دي مرسته دي درسره کوي څه موده ورسته به بيا اجازه و نه لري. او داسي نور . . .

د کندهار نندارې د پرانستو په اړه د هيواد نامتو ډايريکټر ښاغلي واحد نظري صاحب ډېره خوښي څرګندول دايې د هنر د پرمختګ په ډګر کښي يو د قدر وړ کار وباله. او د کندهار نندارې غړو ته يې  په بېلابېلو کتنو کي يې ډېري لارښووني وکړې.