بګرامیوالو مبارک مو شه !

چهارشنبه دغبرګولي څلورمه ١٣٨٤

د کابل ولایت د بګرامیو لېسه

 د ارواښاد پوهاند استاد عبدالشکور ( رشاد ) په نوم ونومول شوه

کله چې د کابل له ښار نه د دغه ولایت ختیخو سیمو ته ورځې نو په لاره کې د شاه شهید له ښکلې سیمې څخه چې د جشنونو او میلو سیمه ده تېریږې نو د سیاه سنګ  زړه وړونکې  او تاریخي سیمه مو مخته راځي چېرې چې د لرغوني ( اپګان ) لرغوني تاریخونه او یادګارونه یې په سینه کې پراته دي خو له بده مرغه چې تر اوسه لا دغه سیمه کې یو لومړنی ښوونځی نه دی جوړ شوی او ماشومان د شاه شهید  او حضوري چمن سیمې ښوونځیو ته په یخنۍ او ګرمۍ کې منډې وهي .همداسې چې وړاندې ځی نو د سیدنورمحمد شاه مینې پراخه او ښایسته سیمه مو زړه باغ باغ کوي ،د سردار محمد داود او ورپسې دولتونو د پاملرنې له مخې  په سید نورمحمد شاه مینه کې ښه ډېر ښوونځی ،سینما ګانې ،کافي ګانې او بازارونه جوړ شوي  او له دغو ټولو برخو دسیمې خلک یو څه  بسیا دي .پورته د نوې کارتې  او بګرامیو ولسوالۍ ترمنځ یو ډېر پخوانی او له کیسو ډک  کوتل راځي چې ترې لاندې ښی لاس ته پراته عسکري کورونه او فامیلي د وخت د چارواکو د غوره ګامونو څرګندونه کوي .د سیدنورمحمد شاه مېنې د تپې او غونډیو په شاه او خوا کې د کورونو جوړولو چټکه پراختیا د سیمې په لا ښایست کې ستره ونډه اخیستې .له کوتل نه چې لږ وړاندې لاړ شې نو لاندې پراخې شنې  سیمه کې   د بګرامیو د نساجۍ فابریکه له ورایه ښکاري ،هغه تولیدي موسسه چې نه یوازې د کمریو ،حسینخیلو ،

 تره کو،اندړو،شینې ،د احمد خان کلا ،بتخاکو،خاک جبار ،خوردکابل اویو شمېر نورو نږدې سیمو کارګرانو ، چې ان د کابل د ښار یو شمېر اوسېدونکوهم  کلونو-کلونه په دغه فابریکه کې چې د اعلیحضرت محمد ظاهر شاه په وخت کې د چین اولسي جمهوریت  لخوا جوړه شوې  ،د کارګرانو په توګه کار کړی.په همدغه سیمه کې به د وزلوبو  ( بزکشۍ) لوبې کېدې،چې د کابل ښار او شاو خوا سیمو په لکونو خلک به ورته نندارې ته راتلل خو  له بده مرغه وروسته  ترې د ملي بس د موټرو ګدامونه جوړ شول .تر هغې مخکې بیا د بګرامیو د ولسوالۍ ښار او بازار  راپیل کیږي ،ښه ګڼه ګوڼه او د راکړې ورکړې تودې ماملې دي .دوکانونو او هټیو ته مخامخ د بګرامیو ولسوال په یوې پخوانۍ ماڼۍ کې  کار کوي او خوا ته یې د بګرامیو لیسه ده چې له نېکمرغه ما او زما ورونو ،کورنۍ او پلار-  نیکه  همدغه ښوونځی لوستلی.دغه ښوونځی کوم ځانګړی نوم نه درلود او هر کله به د سیمې مشرانو یو له بل سره په خبرو کې دغه اړتیا یادوله چې دغه ښوونځي ته د یو ملي مشر یا نومیالي علمي – فرهنګي شخصیت نوم په کار دی او دا دی دا هیله اوس  له خوښیو نه په ډکه فضا کې ترسره شوه  او  د یو غوره او له قدر نه ډک هوډ په پایله کې د افغانستان د اسلامی دولت لخوا د کابل  ولایت د بګرامیو د ولسوالۍ ښوونځی د افغانستان د یو تن نامتو او ګران فرهنګي شخصیت  ارواښاد پوهاند عبدالشکور ( رشاد ) په نوم ونومول شو .موږ دغه وړ او منلي ګام ته ځکه خوښ یو چې له یوې خواد افغانستان دولت په کلتوري  او روزنیزه برخه کې  خپلو ژمنو ته کرار کرار د عمل جامه ور اغوندي  او له بلې خوا د بګرامیو د ولسوالۍ خلک د خپل ګران نه هیرېدونکي فرهنګي مشر ارواښاد پوهاند عبدالشکور رشاد په نوم لیسه او ښوونځی کې  به خپل بچیان په هغه لاره روان کړي چې د خدای بښلي استاد رشاد هیله وه.موږ د بګرامیو د ولسوالی خلک او ځوانان د دولت له دغه غوره ګام څخه ډېره ډېره قدردانی کوو او هیله لرو چې د هېواد قدرمن  استادان ،پوهان ،لیکوال ،څېړونکي او د استاد رشاد محترمه کورنۍ د دغه ښوونځی د لا سمبالښت لپاره د ارواښاد استاد کتابونه،آثار،لیکنې او شعرونه راټول او د دغه ښوونځی کتابتون ته اهدا کړي .