څوک د نوي حکومت جوړېدا سبوتاژ کوي؟

 د ټولټاکنو نږدې درې میاشتې پوره کیږي. خو په ټاکنو کې د ولسمشر اشرف غني په مشرۍ، بریالی لوري تر اوسه نه پریښودل کیږي چې داسې یوه کابینه جوړه او په کارپیل وکړی چې ټاکنیز کمپاین کې يي افغانانو سره ژمنه کړې وه!
د نوې کابینې په اړه ژمنه دا وه چې هغه به مسلکي وي، د کار اهل ته د کار سپارلو پر بنسټ به وي، ځوان پښت او د هېواد لوڼه به يي د ملا تیر جوړوي او تر ټولو مهمه دا چې نوې کابینه به د افغانستان بریا او لویا غواړي او ملي ګټو ته به ملاتړلې او پابسته، ولاړه وي.
اوس پوښتنه دا ده، داسې کابینه د چا له ګټو سره ټکر کوي؟ د داسې کابیني په جوړښت سره به څوک خپلې تنظیمي، سمتي او شخصي ګټې له لاسه ورکړي؟
 ایا ولسمشر اشرف غني او د هغه پلویان او لارویان داسې کابینه نه غواړي او که بل چا د اشرف غني د ملي او پرمختللو تګلارو او دریځونو په وړاندې کمین نیولی؟
 څوک غواړي ولسمشر د کاري او ملي کابینې له جوړېدو محروم کړي او پرځای يی داسې کابینې ته لار اواره کړي چې هغه د ولسمشر پښو او لاسو کې د زولنو او اتکړیو حیثیت ولري؟
 ټوله هڅه دا ده چې ولسمشر اشرف غني څنګه ولس سره په کړیو ژمنو کې بریالي نه شي. څنګه د نوي افغانستان په جوړښت کې د غنې تګلارې او پلانونه شنډ شي. څنګه د اسیا په زړه کې افغانستان بیا خپل وړ او مناسب ځایګی ترلاسه نکړي او د افغانستان د بریا او لویا بیرغ په سیمه او نړۍ کې ځلانده او رپانده نه وي!
د نوي افغانستان ټولې لاسته راوړنې او بریاوې، تر هرڅه مخکې د یوې فعالې، کاري او ملي کابینې له جوړېدو راپیلیږي. تر نورو لومړی د افغانستان ملي ګټو ته، ژمنه کابینه کولای شي په ۲۱ مه پېړۍ او نړیوال ډګر کې، د لرغوني او تاریخي افغانستان پرتمین انځور وړاندې کړي.
له دې ځایه ده چې په کور دننه او هم له بهره؛ د بېلا بېلو لورو، ډلو او کړیو لخوا د کابیني څرنګوالي، جوړښت او وړتیا تر سترګو لاندې ساتل کیږي.
له ټاکنو روسته درې میاشتې د کابیني د جوړېدو ځڼډ، په ټاکنو کې د هغو پرګنو پر وړاندې چې ټاکنو کې يي د اشرف غني په مشرتابه ټیم بریالی کړ، سترګواښ ګڼل کیږي، خود ا ګواښ په هیڅ شان د اشرف غني له لوري نه دی.
د کابیني د ځنډ لاملونه باید د ټولټاکنو د بیځایه اوږدېدو او غځېدو سره یوځای تر کتنې لاندې ونیول شي. هغه کړیو او ډلو چې ټاکنې يي شپږ میاشتې وځنډولې او پرلپسې يي سبوتاژ کړي اوس باید د کابیني د درې میاشتو د ځنډ او سبوتاژ مسوولیت هم پرغاړه واخلي!
د خندا وړ ده چې د سبوتاژونو د ډلې سرخېل «عبدالله عبدالله د کابینې د ځنډېدو پړه پر ولسمشر غني واچوله، ویې ویل چې ولسمشر د مالیې او دفاع له وزیرانو پرته د نورو په باب نهايي پرېکړې ته نه دی رسېدلی. تاند»
که چیري ولسمشر اشرف غني، د عبدالله عبدالله په وړاندیز، د فضل احمد معنوي په څېر د کار نااهله بې مسلکه او ملي ضد کس د کورنيو چارو د وزیر پتوګه نه وي منلی او په دې لامل په کابینه کې ځنډ پېښيږي، زر ځلې دې پېښ شي. که دا شان نور بې مسلکه، نااهله، د جهادي مافیا په کړیو پورې تړلې ناولې او ککړې څېرې بیا په کابینه کې د عبدالله او یا بل چا لخوا وړاندې کیږي، د ولسمشر اشرف غني دنده ده چې ويي نه مني.
افغان ملت د نااهله کابیني او د ناوړه چارواکو د کار په پاتې راتلو کې، پوښتنه لومړی له ولسمشره کوي، نو ځکه کابینه باید د ولسمشر له نظره، څېړنې او پوښتنې تېره شي.
بلخوا عبدالله په خپل ټاکنیز کمپاین کې، افغانانو سره ژمنه کړې وه چې دی او ټیم به يي د فساد په وړاندې مبارزه کوي او له دې کبله يی لکه اورپکی پر پخواني ولسمشر حامد کرزي د خولې پرلپسې ډزې کولې چې کرزی ولې د فساد مخه نه نیسي. خو د ماليي وزارت په تازه رپوټ کې ویل کیږي« د لندن تر کنفرانس درې ورځې مخکې اجراییه ریس عبدالله عبدالله د ولسمشر غني په ځانګړي حکم له مالیې وزارت څخه ۵۵ میلیون افغانۍ د معاشونو او دفتري لګښتونو لپاره اېستلې دي. اوس مالیې وزارت وايي چې عبدالله عبدالله یوازې لس میلیون افغانۍ په معاشونو لګولې او د نورو لګښتونو وجه نشي روښانولی، نو ځکه د ۴۵ ملیونه افغانیو د نه مصرف له وجې باید دغه وزارت ته ۱۲ فیصده جریمه تحویل کړي خو اجرایه ریاست انکار کړی.»
دلته باید د هغه چا په اړه هم څرګندونه وشي چې د کابیني کاري وړتیا او اهلیت په پام کې نه نیسي او په معرفي کولو کې يي بېړه کوي. داسې کسان یا له پېښو بیخبره دي او یا په لویلاس غواړي ځانونه د کابیني د سبوتاژ ډلې سره ملګري کړي او له غلو سره د جوال خوله ونیسي.
یونږدې دوست لیکلي وو « دولت کابینه ندارد - بد است ٬ اما کابینهء بد بسیار بد است.»
بلخوا په ټاکنو کې د ولسمشر اشرف غني د بریالی ټیم او د عبدالله د ټیم درغلي باید په پام کې ولرو.
څوک چې په ټاکنوکې درغلي کولای شي او بیا منکرېدلای شي، په کابینه او دولتي چارو کې ترې هم د ریښتینولۍ تمه عبث ده!
دواړو ټیمونو ته د ملامتیا یو شان ګوته نیول، د درغلګر ټیم سره خواخوږي ښۍ!
موږ باید د وچو له غمه لانده ونه سیځو !
موږ باید د کارټیم او سبوتاژ ټیم سره ګډوله نکړو.
د کار ټیم رغول، جوړول او ابادول کوي؛
 خو د سبوتاژ ټیم ورانول، د ولسونوجنګول او د هېواد خرڅول کوي!
د ۲۰۱۴ کال د ډيسمبر ۳۰ مه