كه څه هم د نړۍ په نورو هېوادونو كې د ژبو د ودې او پرمختګ لپاره په لسګونو اكاډمۍ او مركزونه جوړ شوي، چې د حكومت له خوا يې مالي او معنوي ملاتړ كېږي، چې د كار پايله يې هماغه د ژبو بېسارې پراختيا او پرمختيا ده. همدا وجه ده چې نن سبا زياتې ژبې د كمپيوټر او ټنكالوژۍ په برخه كې كارېدونكي او ژوندۍ دي، چې هغه د چا خبره پر نړۍ راج چلوي.
څرنګه چې د لرغونې، وياړلې او خوږې (پښتو) لپاره كوم دولتي مركز او ارګان نه شته، چې روزنه او پالنه يې وكړي، خو داسې ډېر ځوانان او شاه زلمي پيدا كېږي، چې د خپل ملي احساس له مخې په بېلګړي (انفرادي) ډول د يوې ژوندۍ اكاډمۍ په څېر كار كوي.
عبدالله هنرمل يې يو بل خواخوږى دى، چې په يوازې سر يې د كمپيوټر 98، اكس پي او 2000 وينډوزونو لپاره پښتو پروګرامونه جوړ كړي، چې تر 46زياتې ښكلې او ګلالۍ ليكبڼې (فونټونه) لري.
دغه ځوان د پښتو لنډيو يوه غورچاڼ ته هم كمپيوټري بڼه وركړې، چې ښكلې ډيزاين شوي او هر رديف يې په بېله- بېله پاڼه كې اوډل شوى دى. په دې وروستيو كې يې د رحمان بابا او حميدبابا دېوانونو ته هم كمپيوټري بڼه وركړې او په ښكلې بڼه يې ډيزاين كړي دي.
د هوسۍ اداره له ښاغلي هنرمل څخه مننه كوي، چې د دغې ادارې په كمپيوټر كې يې پښتو وردننه كړه، هوسۍ به يې دغه همكاري نه هېروي، هان! كه چېرې تاسې هم دغه پښتو وينډوزونه، پښتو لنډۍ، د رحمان بابا او حميدبابا دېوانونه د خپلو كمپيوټرونو لپاره په سي ډيانو كې غواړئ، نو په دې پته اړيكي وساتئ:
د خاد كوڅه، موسى خان جامع جومات ته مخامخ، د ښكلا مجلې دفتر، كندهار- افغانستان.