د ١٣٨٣ د سلواغې ٢٦
کابل : د خوست ولايت والي معراج الدين پټان نن ( دوشنبه ) په کابل کې له خبريالانو سره د خبرو پر وخت وويل چې د خوست ولايت اوس ډير خوندي دی .
ښاغلي پټان زياته کړه د خوست په ولايت کې اوس د دۀ په وينا اورپکې دا قدرت نه لري چې له افغان ځواکونو سره مخامخ جګړه وکړي .
ښاغلي پټان وويل اورپکې اوس يوازې په ليرې پرتو غرونو کې پټ وي يوازې د مځکنيو ماينونو يا يو نيم بل غلچکي بريد توان لري .
دۀ وويل له خوست سره که څه هم د ډيورنډ ١٤٠ کيلومتره کرښه غځيدلې خو بيا هم په دا وروستيو کې دغلته افغان ځواکونو امنيت ښه ټينګ کړی دی .
ښاغلي پټان د افغانستان سوداګرو ته بلنه ورکړه چې په خوست کې پانګونه وکړي .
د خوست د ولايت خلک شکايت لري چې د افغانستان د ځينو نورو ولايتونو په پرتله دغلته نه د ښوونې او روزنې په برخه کې او نه هم د نورې بيا رغاونې په لړ کې د پام وړ کار شوی دی .
د خوست استوګن د افغانستان د لوړو زده کړو له وزارت څخه په سرټکونې وايي چې د خوست پوهنتون ته اصلآ پام نه کوي .
دغه راز د خوست ولايت ﻻ تر اوسه ځايي تلويزيون نه لري حال دا چې د افغانستان د ځينو ولايتونو په ولسواليو کې لا تلويزيوني خپرونې شته .