زما ملا او د پاکستان ملا

اوس به راشو قاضي حسين احمد ته  چي د جميعت اسلامي لوی مشر دی او د افغانستان په تباه کولو کي نوموړي هم لويه فريضه سرته رسولې ده !!

دلوی تجارت خو به يې څه نه وايو ، يوازي دومره به ووايو چي دې د دين ټېکه دار ملا !؟  هم د اسلام يو دايس ټېکه دار ځان بولي چي هر وخت د ملي ګټو د ساتني وخت راغلی دی نوموړي ورته لبيک ويلی اوغريب کشميريان او ځيني ناپوهه افغانان يې د خپلو وړونو سره د جنګ لپاره تيار کړي دي ، او په هغوی يې دخپلو هيوادونو تاريخ ، کلتور، او د هيواد پوهان او مشران قتل کړي  دي .

د نوموړي زوی اولور د امريکا په متحده ايالاتو کي په لوړو زده کړو بوخت دي او  اوس خو يې لا لور د پارلمان وکيله هم ده ، مګر په افغانستان کي زما او ستا لوڼي اوخويندي  خو پرېږده چي زما او ستا وړونه او زامنو ته يې هم مکتب ته دتللو اجازه نه درلوده .

د هغوی بايد ښوونځی  مدرسه شي ولي چي افغانانو ته ددنياوي علم هيڅ اړتيا نشته ،هغه چي څومره جاهل او ناپوه وي دومره ښه جهاد کوي ، اوکه چيرته پوه شي نو بيا خو په به حقيقت ورته مالوم شي او د ملي ګټو د ساتني احساس به ورسره پيدا شي .

اوس به لږ راشو د ښاغلي حميد ګل ژوندانه ته ، زما په اند هرافغان اوس په دې ښه پوهيږي ،  پاکستان ته چي څومره کار ښاغلي حميد ګل کړی دی بل هيڅ چا نه دی کړی ،

يو وخت د اسلام اباد يوه پنځه ستوري ( پايو سټارز ) هوټل ته د يوچا سره ولاړم ، هلته مي د نوموړي لور چي عظمي ګل نوميږي او په پاکستان کي د مهران بس سرويس د يوه لوی تجارت ريسه هم ده  وليده ، د  اغلي عظمی ( ګل ) لويدځ ډوله کوږ  ووږ لباس چي مي وليد ډېر يې وځورولم ، ولي چي د نوموړي پلار خو زما او ستا ملا ته د حجاب او پردې درس ورکوي ، اوخپل ګراني لور ته يې لوېديځوال فيشن ورکړی دی . 

د پاکستان لوی خدمتګار چي خپل وطن ته يې ډېر لوی خدمتونه کړي ، افغانستان يې لوټي لوټي کړی ، د خپل کور ښايست لپاره يې د افغانستان تاريخي اثار لوټ کړل .

چي خدای يې شرموي نو يې داسي شرموي : څه موده مخکي مي په پاکستاني مطبوعاتو د جنرال حميدګل مرکه ولوستله ، چي نوموړي په نصيرالله بابړ تورلګولی و چي د نوموړي په کور کي د افغانستان څخه لوټ شوي لوغوني اثار اوس هم شته ، دې حقيقت چي زما اوستا د ملا غوږونه اوس نه وي خلاص کړي څه وخت به يې خلاصوي !؟

د بابړ حالت اوس تر دې حده رسيدلی چي څه موده مخکي يې د خيبر تلويزيون سره د مرکې پر مهال وويل چي په افغانستان کي رهبر نشته ، او حتی چي زموږ  ولسمشر کرزی صاحب يې هم ياد کړ چي هغه هم رهبر نه دی . هغه زياته کړه چي . . . . بېنوا ويبپاڼه سپکي سپوري نه خپروي !

بابړ په دې مرکه کي په ډېر جرائت سره خپل پنجابي واکداران بې غيرته وبلل اوزياته يې کړه چي د هند پنجابيان اوس ددوستۍ خبري کوي دې هندواڼو ددوی ښځي . . . .  بېنوا ويبپاڼه سپکي سپوري نه خپروي  او اوس دوی ورسره خبري کوي .

اوس قضاوت تاسو درنو لوستونکو ته پرېږدم ، تاسو قضاوت وکړ ئ، چي زما او ستا ملا صاحب څه کوي ، او د نړۍ ملايان څه کوي ؟

ګرانو لوستونکو  !

دغه څو کرښي چي مي وليکلې دا مي يوازي د خپل هغه ملي او اسلامي احساس له مخي وليکلې چي ډېر مي ځوروي ، او همېشه دا سوچ راسره پيدا کوي چي زما ملا زما وينه ده ، زما د وطن بچی دی ، هغه ولي د پردو په دې ناولو لومو کښي راګير شي ، اوولي دي خپل وطن لوټي لوټي کړي ، ولي دي خپل وروڼه د يوه او بل په نوم ووژني ، زما د ملا سره ولي د خپل هيواد ملي احساس نشته ، تر څو به په خپل ګرېوان کي نه ګوري ، او خپل احساس ا و مسوليت به ويده ساتي !؟

اوس به راشو زموږ د کليوالو خلکو سوچ ته ، دوی خو دا سوچ کوي چي هر څوک پاچا شي هغه ته بيا پيسې په خپل راځي ، اوهغه خو د پيسو مشين لري ، ګرانووطنوالو داسي نه ده ، حکومت چلول دا کوم اسان کار نه دی دا هغه وخت نه د ی چي ددنيا خلک د يوه بل نه ناخبره وو ، اوس د Globalization وخت دی ، د ټولي دنيا څخه يو کلی جوړ شوی دی هر هيواد په خپله پوره نه دی ، بيا زما اوستا غريب هيواد چي ٩٠ په سلو کي وګړي يې بې زده کړي دي نه خپل حق پېژني او نه د پردي .

دا به څرنګه وکولای شي چي خپل هيواد وساتي ، ددې لپاره د نړيوالو مرستو ته اړتيا شته ، او که چيرته نړيوالي مرستي نه وي هيڅ امکان نشته چي ما اوتادي خپل ګلشن سمسور کړو ،زما اوستا ګاونډی هيواد پاکستان هم ددنيا په مرستو چليږي ، او د دنيامرستي دي چي حتی د يوه هيواد بهرنی سياست په بدلون کي لوی لامل ګرځي ، زه اوته که په رښتيا سره ملي او اسلامي ګټو او مسوليتونو ته درناوی وکړو نو زما او ستا د ابدالي بابا دا تاريخي کور به هم جوړ شي . لکه څرنګه چي مو د روسي ښکېلاک په وړاندي مبارزه وکړه اود ټولي نړۍ تېره بيا امريکا متحده ايالاتو مرستي مو ومنلې که هغه مرستي راسره نه وای ايا زما او ستا په توره  به څه کولای شول !؟

د نړۍ سره هم زما او ستا د کور اوعقيدې کوم فکر نه و ، د هغوی خپلي ګټي وې ليکن کله چي زما او ستا د لويو ګټو سوال راشي نو بايد بيا خپل مسوليت اداکړو ، اواوس چي دمتحده ايالاتو په مشرۍ نړيوال طاقت په افغانستان کي پروت دی او زما اوستا سرحدونه يې د خپلو ګاونډيانو دمداخلې څخه ساتلي او زما اوستا دملي اردو پوليسو زده کړي ، تجهيزات ، او د وطن د ابادۍ په کارونو کي مرسته راسره کوي ، ولي يې دښمني وکړو ، لکه څرنګه چي د جهاد په وخت کي دې نړۍ له موږ سره مرسته وکړه ، او موږ بريالي شوو ، همدا شان اوس د خپلو ملي ګټو لپاره بايد ددې طاقتونو موجوديت قبول کړو ، او که چيري داسي ونه کړو نو بيابه هر څوک خپلي لاري درنه جلاکړي ، لکه څرنګه چي مشرف صاحب د ( سب سې پهلې پاکستان ) ياني تر ټولو لومړی پاکستان  ناره ووهله ، او خپل دريځ يې دبوش په يوه ټيلفون سره بدل کړو ، زما اوستا لپاره هم ړومبی افغانستان دی !

خدای مکړه که افغانستان نه وي نه به ته يې نه به دي غيرت وي اونه عزت .

په اخير کي دخپل وطن د درې رنګه مغروره بيرغ د تل تر تله رپا او د ټولو وطنوالو د هوسا ژوند په هيله !