١٣٨٤ غويی ١٨مه - کابل
(نوى به تاريخ د پاني پت او اصفهان كړو...)
د غويي پر اتمه نېټه چې په كابل كې مجاهدينو د خپل بري ورځ لمانځله هماغه شپه د طلوع ټلويزيون له لارې د ځوان سندرغاړي خالق عزيز يوه ملي ترانه خپره شوه، چې (لوړ به دې نښان كړو) يې په منځ- منځ كې تكراروله. دا سندره پخوا تصويري نه وه، لكه څنګه چې ښكاري په دې وروستيو كې انځوريزه شوې ده.
د دې ترانې په يوه بيت كې راغلي چې (نوى به تاريخ د پاني پت او اصفهان كړو...)
خو اوس چې دا سندره په لسګونو ځله خپره شوې، تر دې وروسته يې دغه بيت ورڅخه ايستل شوى دى. دغه راز يې د افغانستان په ملي راډيو ټلويزيون كې يې له ثبتولو (ريكارډ) څخه انكار شوى او دا كار يې د افغانستان د ګټو خلاف كار ګڼلى دى.
د طلوع ټلويزيون كاركوونكي وايي چې د اطلاعاتو او كلتور وزارت چارواكو ورته ټليفون كړى و او په ټينګه يې ترې وغوښتل چې دا بيت دې له دې ترانې څخه ځكه وباسي، چې ځينې نژدې هېوادونه به له دې وزارت څخه خپه شي، دا ځكه چې دوى ورسره ډېر نژدې روابط لري.
خو په كابل او ځينو شاو خو سيمو كې ځينې خلك پر دې كار سخت په غوسه دي. عبدالله احمدي چې د كابل په سراى شمالي كې استوګنه كوي وايي:
دغه وزارت چې اوس يې نوم (وزارت اطلاعات، فرهنګ و توريزم) شوى، په خپل نوم كې د ګرځندوى پر ځاى توريزم ليكي، ځكه چې ګرځندوى پښتو نوم دى، حال دا چې دلته پخوا موږ د ګرځندوى په نوم يو مستقل رياست درلود، اوس چې دغه رياست په دې وزارت كې منحل شوى،نو تاسې وينئ چې د دې وزارت چارواكي انګرېزي تر پښتو غوره ګڼي.
نوموړى د دې ترانې په باب زياتوي:
په دې ترانه كې زموږ د ملي مشرانو د كارنامو يادون شوى دى، ليرې كول يې پر خپل ملي تاريخ باندې خاورې اړول دي. زه په خپله دا كار په كلكه غندم او له نورو كلتورپالو ځوانانو څخه غواړم چې په دې باب دې اقدام وكړي.
اسمعيل بهين چې يو ځوان ادبپال دى، وايي:
موږ له كلتور وزارت څخه پخوا هم ښه خاطره نه درلوده اوس يې هم نه لرو، دغه وزارت قصداً او عمداً داسې كارونه كوي چې زموږ ملي كلتور ته سخت په تاوان دي. مثلاً صبا مجله كه د احمدشاه بابا كارټون چاپوي او سپكاوى يې كوي، هېڅ هم ورته نه ويل كېږي، آن چې همدغه وزارت يې قصداً پر كارونو سترګې پټوي، كه افتاب غوندې جريده د اسلام سپكاوى كوي، په خپله وزير (مخدوم رهين) ورته د تېښتې امكانات برابروي، خو دلته بيا كه زموږ ملي وياړنې يادېږي، وزارت پرې سترګې پټوي.
لكه څنګه چې تېره ورځ د كابل په عيدګاه سيمه كې د لوى احمدشاه بابا يو لوى انځور د شپې له خوا څيرى كړل شوى او اوسپنيزه لوحه يې هم د موټر په مرسته شكول شوې ده، په دې باب تر اوسه پورې چارواكو كوم غوڅ غبرګون نه دى ښوولى، په زياتو ولايتونو كې ځوانو كلتورپالو پر دې كار سخته غوسه ښكاره كړې ده. چې د كلتور وزارت له وروستي اقدام سره يې يو څه تړاو ويني. خو څرګنده نه ده چې د جګپوړو چارواكو غبرګون به څه وي؟. خو كتونكي اټكل كوي، چې دا كار به ډېر سخت غبرګونونه راوپاروي او افغان اديبان به ډېر په غوسه شي.