يوه ورځ يو ښکاري د مېوو په ډک باغ ورننوت په بيړه بيړه يې هر خوا لومې خپرې کړې د قسمت کار و ، د ښکاري په لومو کې يوازې يو تک شين توتي او بل تک تور کارغه راګېر شول ، ښکاري هم په منډه منډه دواړه په يوه پنجره کې سره واچوال او پخپله مخه روان شو٠
څو ورځې تېرې شوې ښکاري ته فکر ورغی چې ، ياره توتي خو خبرې هم کولای شي ، بڼه او سيکه يې هم ښکلې ده ، نارې او غږ يې هم په غوږونو ښه لګېږي او په ښې بيعې او قيمت هم ارزي ،او بد شکله کارغه خو نه چندانې سيکه لري ، نه يې غږ ښکلې دی او نه کومه ټکه ارزښت لري ، زه څه لېونی يم چې هسې پرې وړيا دانې خوروم ، په همدې خبرو کې مسکی شو ، عجب کار دی توتي ته ګوره چې په پنجره کې خواړه نه خوري ، هره ورځ په خپلو وينو رنګ وي او د پنجرې نه د وتلو هڅې کوي مګر د کارغه بيا هيڅ چرت نه دی خراب ، په پنجره کې يې لا اشتيا صافه ده ٠ په همدې خبرو کې پنجرې ته راورسېده او غوښتل يې چې کارغه له پنجرې ايله کړي او زياتي ځان د کارغه له اضافه مصرف نه خلاص کړي ، په همدې ترڅ ګورې چې د پنجرې څو سيمان کاږه واږه شوي او د شين توتي پر سرو وينو رنګ دي ، څو سرې او شنې بڼکې پرتې دي او توتي الوتی دی ٠
ښکاري ډېر خواشينی شو يو سوړ اسوېلی يې وويست او بيا يې کارغه ته د پنجرې دروازه خلاصه کړه چې والوځي ، ښکاري ډېر انتظار وکړ مګر کارغه له پنجرې وتل نه غوښتل او د ازادۍ تر نعمته يې وړيا دانې غوره ګڼلې٠