د کندهار ګمرک مسوولين خبر ورکوي ، چې د تير کال په پرتله يې عوايد ( ۷۷ ) سلنه زيات سوي دي .
د ګمرک رييس يې د زياتوالي لاملونه د مامورينو مسلکي کيدل او د عصري وسايلو برابرول بولي ، نوموړی په خپله اداره کې د شفافيت څخه خبر ورکوي .
کندهار يو سرحدي ولايت دی او د دې ولايت لويو چارو ته په کتو سره سوداګريز کاروبار هم زيات ښکاري چي له امله يې د دولتي ادارو له لوري زيات عوايد هم ترې تر لاسه کيږي ، خو اداري او مالي فساد پر دې ادارو د خلکو بې باوري زياته کړې ده .
د کندهار د ګمرک رييس سيدجمال هاشمي وايې ، چې د کندهار په ګمرک کي د عصري ماشينونو د نصب او د دې ګمرک د کارکوونکو د روزني له امله يې د فساد مخه نيولي ده او دا مهال د تير کال د لمړۍ ربعې په پرتله د روان مالي کال د لمړۍ ربعې عوايد ( ۷۷ ) سلنه زيات سوي دي .
ښاغلی هاشمي زياتوي ، چي تير کال يې د کاروبار د کمزوري کيدلو له امله عوايد کم سوي وه خو سږ کال روان عوايد تر ورکړل سوي هدف هم زيات دي .
هاشمي د خپلو ادارې کسانو روزنه لويه لاسته راوړنه بولي او وايې چې دا مهال يې نژدي ټول کارکوونکي مسلکي روزل سوي دي .
د کندهار ګمرک هم يوه له هغو ادارو څخه ده ، چي خلک پکښي د پراخ فساد څخه شکايت کوي ، خو د کندهار والي وروستيو څرګندونو چي د فساد په وړاندي د جدي مبارزې په اړه يې زموږ د خبريال سره په ځانګړې مرکه کې کړي دي خلک هيله من کړي دي چي په دولتي ادارو کي به د فساد کچه ټيټه او د خلکو کارونه به ژر او تر ډيره په قانوني ډول خلاصيږي .