په کندهار کي د مورنۍ ژبي په اړه يو ورځنی سمينار تر سره او پر مهال يي د مورنۍ ژبي پر ارزښت او اړتيا باندي د هيواد لويو ليکوالانو مقالې ولوستلې .
دا سمينار د کندهار پوهنتون اړوند د پاچاخان د علمي او څيړنيز مرکز له لوري جوړ سوي وو .
د سمينار برخوالو د خپلو مقالو پر مهال مورنۍ ژبه د هر کس حق وباله او د ټولي نړۍ دولتونه يې مکلف وبلل چي وګړو ته په خپله مورنۍ ژبه د زده کړي زمينه برابره کړي .
د مقالو ليکوالان د پاچاخان د علمي او څيړنيز مرکز مشر اينجينرشيرشا رشاد ، ليکوال او څيړونکي استاد حبيب الله رفيع او يو شمير نور وه ، هغوی د مورنۍ ژبي پر ارزښت او اړتيا باندي تفصيلي مقالې ولوستلې .
هغوی خپله ژبه د انسان حق وباله او زياته يې کړه چې په خپله ژبه پرمختګ ژر شونی دی او علمي سويه هم ژر په لوړيدلای سي .
ليکوال او استاد ، حيات الله رفيقي وايي ، چي د نورو ژبو زده کول که څه هم لوی کمال دی خو د خپلي ژبي پياوړتيا ته توجه زياته اړينه ده .
دا سمينار په کندهار کي د غازي نقيب الله اخند د ښيګڼي د بنسټ په مالي مرسته جوړ سوی وو چې په پای کي يې د بنسټ پرانستنه هم وسول ، د دې بنسټ مشر کليم الله نقيبي وايي چي بنسټ به يې په فرهنګي ، ښوونيزو ، ورزشي ، ټولنيزو اړيکو او ورته نورو برخو کي کارونه مخ ته يوسي څو د دې لاري هره برخه پياوړي او وده ورکړي .