د افغانستان لپاره د ملګرو ملتونو ځانګړی استازی نیکولاس هایسم وايي، د ثبات پر لور د افغانستان په لاره کې باید خنډ رامنځ ته نه شي. هایسم وايي، د مشرتابه پر سر د طالبانو ترمنځ روانې ناندرۍ به په راتلونکو اونیو کې له افغان حکومت سره د دې ډلې د سولې د خبرو د بیا پیل مخه ونه نیسي. نیکولاس هایسم دا څرګندونې پرون خبریالانو ته کړي. د افغانستان لپاره ملګرو ملتونو استازي نیکولاس هایسم همدارنګه وویل، د سیپټمبر په ۲۶ نیټه به په ملګرو ملتونو کې د نړۍ مشرانو د راټولیدو پر مهال د امریکا د بهرنیو چارو وزیر جان کري له خپل چینايي سیال سره د افغانستان په اړه د یوې غونډې مشري وکړي، خو هغه د دې غونډې په اړه ډېر څه نه دي ویلي.